ՄԱԿ-ի գլխավոր քարտուղար. հասել ենք մի կետի, երբ կարող ենք վերջ տալ ՁԻԱՀ համաճարակին

ՁԻԱՀ-Ի դեմ պայքարի համաշխարհային օրվա կապակցությամբ ուղերձ է հղել ՄԱԿ-ի գլխավոր քարտուղար Պան Գի Մունը` նշելով, որ ՁԻԱՀ-ի տարածման չորրորդ տասնամյակում վերջապես հասել ենք մի կետի, երբ կարող ենք վերջ տալ այս համաճարակին:
«Մինչ օրս գրանցված մեր առաջընթացն ապացույցն է այն բանի, որ մենք ի վիճակի ենք կյանքի կոչել մեր տեսլականը, այն է՝ ՄԻԱՎ վարակի նոր դեպքերի զրոյական մակարդակ, զրոյական խտրականություն և ՁԻԱՀ-ով պայմանավորված մահերի զրոյական քանակ:

ՄԻԱՎ-ով վարակման նոր դեպքերի քանակը 1997 թվականից ի վեր կրճատվել է ավելի քան 20 տոկոսով: Վարակման նոր դեպքերի քանակը շարունակում է նվազել աշխարհի շատ մասերում: Աֆրիկայի՝ Սահարայից հարավ ընկած հատվածում՝ ՁԻԱՀ համաճարակի ամենամեծ տարածումն ունեցող տարածաշրջանում, ՄԻԱՎ վարակի հիվանդացության մակարդակը նվազել է 22 երկրներում:

Բնակչության առավել վտանգի ենթարկվող խմբերի շրջանում համաճարակը «տեղատվություն» է ապրում: ՄԻԱՎ վարակի կանխարգելման ծառայությունների հասանելիությունը երիտասարդներին, կոմերցիոն սեռական ծառայություններ տրամադրողներին և նրանց հաճախորդներին, թմրամիջոցների ներարկային օգտագործողներին, տղամարդու հետ սեռական հարաբերություններ ունեցող տղամարդկանց և տրանսգենդերներին օգնում է ստանձնել սեփական առողջության վերահսկումը՝ հանուն իրենց բարօրության:

Բուժումը 1985 թվականից ի վեր կանխել է ՁԻԱՀ-ով պայմանավորված 2.5 միլիոն մահ: Միայն անցյալ տարի 700 000 կյանք է փրկվել: Ցածր և միջին եկամուտ ունեցող երկրներում բնակվող և բուժման կարիք ունեցող անձանց գրեթե կեսը՝ մոտ 6.6 միլիոն մարդ, այժմ բուժում է ստանում:

ՄԻԱՎ վարակի կանխարգելման և բուժման միջև դրական փոխազդեցությունները (սիներգիաները) արագացնում են գործընթացը:
Սակայն ՁԻԱՀ-ին վերջ տալու համար անհրաժեշտ է, որ մենք ապահովենք նույնիսկ ավելի մեծ արդյունքներ:
Այս տարվա հունիսին Միավորված ազգերի կազմակերպության Գլխավոր ասամբլեայի ՄԻԱՎ/ՁԻԱՀ-ի հարցերով բարձր մակարդակի հանդիպման ընթացքում 2015 թվականի համար ընդունվեցին համարձակ թիրախներ. կիսով չափ կրճատել ՄԻԱՎ-ի փոխանցումը սեռական ճանապարհով, վերացնել երեխաների վարակման դեպքերը, բուժում ապահովել ՄԻԱՎ-ով ապրող 15 միլիոն անձանց համար, վերջ տալ խարանին ու խտրականությանը, փակել ՁԻԱՀ-ի դեմ պայքարի ֆինանսավորման բացը:
Ուժեղ քաղաքական կամքի, խելամիտ ֆինանսական միջոցների առկայությամբ և մարդու իրավունքների հիման վրա որդեգրած հաստատակամ մոտեցմամբ մենք ի վիճակի ենք հասնել նշված բոլոր թիրախներին:

Հաջողության հասնելու հարցում ֆինանսավորումն ունենալու է վճռորոշ նշանակություն: Այս խնդրին առնչություն ունեցող բոլոր կողմերին կոչ եմ անում գործնական քայլերի դիմել ՄԱԿ-ի ՄԻԱՎ/ՁԻԱՀ-ի միացյալ ծրագրի կողմից առաջ քաշված ֆինանսավորման ծրագրի շրջանակներում և ամբողջությամբ ապահովել ներդրումների համաշխարհային նպատակային ցուցանիշի ֆինանսավորումը՝ տարեկան 24 միլիարդ դոլար: Արդյունքը կփոխհատուցի կարճաժամկետ ծախսերը մեկ սերնդի կյանքից էլ պակաս ժամանակահատվածում:

Մենք պարտավոր ենք հենվել այն քաղաքական հանձնառությունների, ներդրումների, էներգիայի, ակտիվիզմի և նպատակասլացության վրա, որոնք մեզ հասցրել են այս շրջադարձային կետին:
Շարժման ընթացքը նպաստավոր է: Եկեք օգտագործենք այն՝ մեկընդմի՛շտ վերջ տալու համար ՁԻԱՀ-ին»,-ասված է ուղերձում:

Հարցեր, պատասխաններ, մեկնաբանություններ