Հարցազրույց «Գորիսի բժշկական կենտրոն» ՓԲԸ տնօրեն, բ.գ.դ., ՀՀ ԲԳԱ անդամ Սլավիկ Ամիրյանի հետ

Արցախյան հակամարտության տարիներին Գորիսի կենտրոնական շրջանային հիվանդանոցը դարձել էր անհետաձգելի բուժօգնության կենտրոն:  

– Գորիսի ազատագրական պայքարի պատմությունը փառապանծ էջեր ունի: Արդարամիտ, մարտնչող նախնիների գեները, անշուշտ, որոշակի դեր խաղացին արցախյան ազատամարտի տարիներին...##, մասնավորապես երկիրը Արցախի հետ անմիջապես կապող միակ ճանապարհն անսասան պահելու և հյուսիս-արևելյան սահմաններն ամրապնդելու գործում: Այստեղ մեծ էր հաղթանակի կայացման համար Ձեր կողմից ղեկավարվող, ես կասեի` ռազմաբժշկական, բազմապրոֆիլ ծառայության դերը: Ցանկալի կլինի լսել Ձեր գնահատականը և տպավորություններն արդեն կայացած 20-ամյա հանրապետության ստեղծման, գոյատևման, զարգացման վերաբերյալ` կապված Գորիսի առողջապահական համակարգի վերակազմավորման փուլերի հետ: 

– Արցախյան հակամարտության տարիներին Գորիսի կենտրոնական շրջանային հիվանդանոցը դարձել էր Սյունիքում անհետաձգելի բուժօգնության կենտրոն, որտեղ իրականացվում էին հարավ-արևելյան տարածաշրջանի հանգրվանային հոսպիտալի գործառույթները:

Հիվանդանոցի անձնակազմի անձնվեր աշխատանքի, մեծ հայրենասիրության, մարդասիրության և բարձր մասնագիտական ունակությունների շնորհիվ պատերազմական գործողությունների ժամանակ փայլուն կերպով կազմակերպվել և իրականացվել են անհետաձգելի բուժօգնություն ռազմական գործողությունների օջախում, հրետակոծության ենթարկված բնակավայրերում` փրկելով հազարավոր վիրավորների կյանք: Ամբողջ ծավալով իրականացվել են որակյալ և մասնագիտացված բուժօգնություն, ստացիոնար բաժանմունքներում, վիրավորների անհետաձգելի օգնություն և տարհանում կլինիկական բազաներ: Հակամարտության ընթացքում վիրաբույժների կողմից կատարվել են 5000-ից ավելի վիրահատություններ: Պետք է ասել, որ բուժվածների շուրջ 90%-ը վերադարձել է մարտադաշտ: Հումանիտար միջանցքի բացումից հետո հիվանդանոցը նպաստել է ազատագրված տարածքներում բուժօգնության ծառայությունների ստեղծմանը և բուժօգնության կազմակերպմանը:

90-ականների համեմատ ներկայումս կրճատվել է մահճակալային ցանցը, բարձրացել է վերջինիս օգտագործման արդյունավետությունը, նպատակահարմարությունը, իջեցվել է ծախսատարությունը: 

– Ավելորդ չէր լինի լսել նաև Ձեր` պատերազմի բովով անցած ղեկավարի, ռազմական բժշկի, ՀՀ ԲԳԱ անդամի կարծիքը Գորիսում առողջապահության զարգացման հեռանկարների մասին:

– Բնականաբար, առողջապահական համակարգի ներկա վիճակին անդրադառնալիս առավելագույն ուշադրություն է դարձվում

և´բուժանձնակազմի կատարած աշխատանքին, և´ հիվանդանոցի անցած ուղուն, որը ստիպում է նորովի օգտվել կուտակված փորձից և առկա հնարավորություններից: 

2010 թ. բացվեց Գորիսի վերակառուցված և վերազինված բժշկական կենտրոնը: Այս ծրագիրը հանրապետության առողջապահության նախարարության մեծ ներդրումն էր մարզային առողջապահության զարգացման գործընթացում: Վերջինս ունի ռազմավարական մեծ նշանակություն և լինելով Արցախի ու ՀՀ առողջապահական համակարգերի միասնականության և արդիականացման կարևոր օղակներից մեկը, նպաստում է սահմանամերձ շրջանների բնակչության որակյալ և անհրաժեշտ ծավալի բուժօգնության իրականացմանը: 

Շտապ և անհետաձգելի բուժօգնության կազմակերպման ժամանակ հաճախակի հանդիպող դժվարությունների վերացման նպատակով բացվել է կառուցվածքային նոր միավոր` անհետաձգելի բուժօգնության բաժանմունքը, որը խիստ արդիական է, և որտեղ հաճախ հանդիպող հիվանդությունների և հիվանդագին վիճակների ախտորոշումն ու բուժական միջոցառումներն իրականացվում են մեկ ընդհանուր ծառայության կողմից: Դրա շնորհիվ հնարավոր եղավ նվազեցնել ինչպես մահացության ցուցանիշը, այնպես էլ բարդությունների թիվը: Կտրուկ բարելավվել է մանկաբարձագինեկոլոգիական ծառայության որակը: Վերակառուցման և վերազինման աշխատանքների շնորհիվ ստեղծվել են լավագույն պայմաններ ծննդօգնության իրականացման համար: Նորություն է անհատական ծնարանի, մանկական վերակենդանացման բաժանմունքի ստեղծումը: Հարմարավետ հիվանդասենյակները մշտապես ապահովված են տաք և սառը ջրով, սանհիգիենիկ մասնաբաժիններով, գույքով, սարքավորումներով: Պատահական չէ, որ բաժանմունքից օգտվում են նաև հարակից տարածաշրջաններից եկող հղիները: Նկատի ունենալով բաժանմունքի բուժանձնակազմի բարձր մասնագիտական պատրաստվածությունն ու աշխատանքի որակը, ՀՀ առողջապահության նախարարի հրամանով կենտրոնի մանկաբարձագինեկոլոգիական բաժանմունքին շնորհվել է երկրորդ կարգի ծննդօգնություն իրականացնող կազմակերպության կարգավիճակ:

Ուրախալի է, որ ութ ամսվա տվյալներով բժշկական կենտրոնում բուժվել են 23 օտարերկրացի: 

Նախատեսել ենք հետագայում համակարգչային տոմոգրաֆ ձեռք բերել, որը կնպաստի Սյունիքի, ինչպես նաև Արցախի բնակչության ախտորոշիչ ծառայության որակի բարձրացմանը: 

Ապագայում մեր ջանքերը ուղղվելու են հիվանդանոցի աշխատակիցների մասնագիտական ունակությունների բարձրացմանը, նոր մասնագետներով համալրմանը, նյութատեխնիկական բազայի հզորացմանը, սարքավորումների ժամանակին թարմացմանը, նոր ծառայությունների ստեղծմանը: Ներկայումս ունեցած կադրային և նյութական ռեսուրսները թույլ են տալիս հուսալու, որ առաջիկա տարիներին մենք կունենանք բազմապրոֆիլ բաժանմունքներով հագեցած, որակյալ և անհրաժեշտ ծավալով բուժօգնություն իրականացնող բժշկական կենտրոն, որը հնարավորություն կտա առողջապահության համակարգը մոտեցնել եվրոպական ընդունված չափանիշներին:

– Այսօր «Առողջապահություն» հանդեսը 55 տարեկան է: Այն իր գոյատևման առաջին տասնամյակների ընթացքում բազմաթիվ կապերով առնչվում էր Գորիսից սերված բոլոր բժիշկ-գիտնականների, Գորիսի շրջանի բոլոր բժշկական հիմնարկների, ինչպես նաև բնակչության զգալի թվով ընթերցողների հետ: Կուզենայինք մեր ընթեցողին հաղորդել հանդեսին ուղղված Ձեր մաղթանքները և կարծիքը երբեմն ի կապերը վերականգնելու մասին:

– «Առողջապահություն» հանդեսը 55 տարեկան է: Դա մեծ ուրախություն է հանրապետության բուժաշխատողների համար: Իր ստեղծման օրից նրա կոլեկտիվը լծվել է մի ծանր և շնորհակալ աշխատանքի, որի պտուղները ներկայումս քաղում ենք բոլորս: Հանդեսի հեղինակության մասին են խոսում այն փաստերը, որ ինչպես գիտական շրջանում, այնպես էլ կենցաղում բավական հաճախ ենք հանդիպում որևէ փաստարկի վերաբերյալ վիճաբանությունների, որը սովորաբար վերջանում է անառարկելի շեշտադրությամբ`«Առողջապահություն» հանդեսում այսպես է գրված: Սա խոսում է այն փաստի օգտին, որ հանդեսի աշխատակիցները մեծ ուշադրությամբ ու պատասխանատվությամբ են վերաբերվում տպագրված նյութերի ընտրությանը, արդիականությանը և վերջինիս մատուցման եղանակին: Հանրապետությունում չկա որևէ պրակտիկ բժիշկ կամ գիտաշխատող, որ նույնիսկ 90-ականների դժվար տարիներին չհանդիսանար հանդեսի ընթերցողը ու համախոհը: Վերջին տարիներին մեծապես աճել է հանդեսի ընթերցողների թիվը: Ուրախալի է, որ ավելացել է հանդեսում քննարկվող նյութերի շրջանակը և որակը: «Առողջապահություն» հանդեսում տպագրվելը եղել է մեզ մոտ աշխատած և աշխատող բժիշկ-գիտնականների առաջին ուղեգիրը գիտական հետազոտությունների իրականացման ճանապարհին: 

Ցանկանում եմ իմ և մեր կոլեկտիվի անունից հանդեսի բոլոր աշխատողներին ուղղել մեր անկեղծ մաղթանքները կատարած հսկայական աշխատանքի համար, հավաստիացնել, որ դուք եք բնակչության շրջանում սանիտարալուսավորչական, ընդհանուր բժշկական գիտելիքների տարածման առաջատարը և բարձր եք պահում հանրապետության առողջապահական համակարգի լավագույն ավանդույթները:

Հարցեր, պատասխաններ, մեկնաբանություններ