Պատվաստման ֆլեշմոբ «Արմենիա» հանրապետական բժշկական կենտրոնում. armeniamedicalcenter.am

ՀՀ առողջապահության նախարարի հրամանի համաձայն (պետական պատվերի շրջանակներում սեզոնային գրիպի դեմ (Վաքսիգրիպ) պատվաստումներ Հայաստանի Հանրապետությունում կազմակերպել և իրականացնել կամավոր սկզբունքով…), «Արմենիա» հանրապետական բժշկական կենտրոնում ս/թ դեկտեմբերի 10-ին կազմակերպվել էր պատվաստման իրականացման ֆլեշմոբ բուժանձնակազմի շրջանում:

Միջոցառման կարևորությունը նրանում է, որ սուր շնչառական վարակիչ հիվանդություններից ամենատարածվածը գրիպն է, որը բնութագրվում է համաճարակների, երբեմն նաև պանդեմիաների` համավարկաների առաջացմամբ ու հղի է մի շարք լուրջ բարդություններով, որոնցից ամենատարածվածը թոքաբորբն է, ինչը մեծ վտանգ է ներկայացնում նաև բուժաշխատողների համար: Նրանք գրիպով հիվանդանալու տեսանկյունից ռիսկի խմբում են, քանի որ գրիպով հիվանդներն առաջինը դիմում են բուժաշխատողներին:

Ուստի շատ կարևոր է, որ բոլոր բուժաշխատողները պատվաստված լինեն գրիպի դեմ, քանի որ ցանկացած կառավարելի վարակիչ հիվանդության, այդ թվում նաև սեզոնային գրիպի դեմ, պայքարի ամենաարդյունավետ միջոցը պատվաստումն է: Պատվաստվելով, առաջինը մարդն իրեն է պաշտպանում, և հետո նաև իր շրջապատին` կոլեկտիվ անընկալունակության ձեռքբերման միջոցով:

Պատվաստումներն անկացվեցին Վաքսիգրիպ և ԱԴՓ-Մ (դիֆթերիայի և փայտացման) պատվաստանյութերով, քանի որ, ելնելով աշխարհում դիֆթերիայի հիվանդացության լարված իրավիճակից, անհրաժեշտ է պատվաստվել նաև դիֆթերիայի դեմ: Աշխարհի մի շարք երկրներում` Հնդկաստան, Վենեսուելա, Հարավային Աֆրիկայի որոշ երկրներ, Ուկրաինա և այլն, արձանագրվել են դիֆթերիայից մահվան դեպքեր: Եվ, քանի որ ներկայում շփումները վերոնշյալ երկրների հետ, մասնավորապես` Հնդկաստանի ազգաբնակչության հետ մեծ են, դիֆթերիայի դեմ պատվաստումը կարևոր նշանակություն է ստանում:

Խնդրին վերաբերող հարցերի շուրջ զրուցեցինք «Արմենիա» հանրապետական բժշկական կենտրոնի համաճարակաբանության ծառայության ղեկավար Նունե Քրիշչյանի հետ:

–   Այսօր «Արմենիա» բժշկական կենտրոնի ամբողջ բուժանձնակազմը միանում է բուժաշխատողների շրջանում անցկացվող գրիպի և դիֆթերիայի պատվաստումների իրականացմանը: Այն կատարվում է ՔԿԱ կլինիկայում, քանի որ դիֆթերիայի կասկածի դեպքում պացիենտներն առաջինը դիմում են քիթ- կոկորդ-ականջաբաններին:

Մեր օրինակով ցանկանում ենք ցույց տալ, որ բժիշկները չեն վախենում պատվաստումներից, քանի որ դրա արդյունքում ենք կանխարգելում գրիպի և դիֆթերիայի հնարավոր բարդությունները: Գրիպի ժամանակ ամենատարածված բարդությունները թոքաբորբերն են, որոնց հետ հաճախ ենք առնչվում:

Պատվաստանյութը գրիպի A և B շտամերի, H-1 N-1 ենթատեսակների (խոզի գրիպ) դեմ է: Պատվաստանյութը ներարկվում է անհատական ներարկիչներով:

–   Հնարավո՞ր է կանխատեսել տվյալ տարվա սեզոնային ինֆեկցիաները և որքանո՞վ է հավանական, որ ինֆեկցիայի տարածման ժամանակ հենց այս շտամերը կլինեն:

–   Սեզոնային վարակները կանխատեսել հնարավոր է, միշտ պետք է պատրաստ և աչալուրջ լինել, քանի որ վարակի վտանգը միշտ կա: Իհարկե, հաշվի առնելով նախորդ տարիների փորձը, ներկայում ևս առկա են A և B տիպի շտամերը և նրանց ենթատեսակները: Եվ հենց այդ ամենատարածված ենթատեսակներն էլ նախատեսված են այս պատվաստանյութի մեջ:

–   Նմանատիպ ֆլեշմոբ անցկացվե՞լ է նախկինում:

–   Ֆլեշմոբն անցկացվում է առաջին անգամ, բայց պատվաստումներն արդեն մի քանի տարի է, ինչ իրականացվում են: 2009 թվականից մենք առնչվել ենք այդ խնդրի հետ, ունեցել ենք բազմաթիվ հիվանդներ, նույնիսկ H-1 N-1 ենթատեսակով վարակված հիվանդներ, որոնք անկանխատեսելի կլինիկայով էին մեզ դիմում: Նման դեպքերը պատճառ էին, որ ակտիվ մասնակցենք այդ ոլորտին վերաբերող տարբեր գիտաժողովների, նաև վերապատրաստվենք: Մենք առաջնորդվում ենք Առողջապահության համաշխարհային կազմակերպության ընթացակարգերով և՛ բուժման, և՛ պատվաստումների հարցերում:

Եվ այսօր, ինչպես ամեն տարի, առաջինը կպատվաստվեմ ես:

Վասակ Մելիքսեթյան, Արմենիա հանրապետական բժշկական կենտրոնի ՔԿԱ կլինիկայի ղեկավար

–   Որքանո՞վ է անհրաժեշտ այս միջոցառումը:

–   Սեզոնային գրիպի պատվաստումներն արդեն մոտ մեկ ամիս է կատարվում են հանրապետության տարբեր բուժհիմնարկներում: Այսօր այդ պատվաստումների ֆլեշմոբն է անցկացվում «Արմենիա» բժշկական կենտրոնում: Բուժաշխատողների շրջանում պատվաստումների անցկացման նպատակը մեր քաղաքացիներին օրինակ ծառայելն է, որովհետև կա կարծիք, որ բժիշկները խորհուրդ են տալիս, բայց իրենք չեն պատվաստվում: Այս կերպ փորձում ենք ցույց տալ, որ նման միջոցառումները կարևոր են, և բռնկումներից խուսափելու ճանապարհը սա է:

–   Որքանո՞վ է վտանգավոր դիֆթերիան մեծահասակների մոտ:

–   Վտանգը միշտ կա և կարևոր է, որ մեր ազգաբնակչությունը տեղեկացված լինի ինֆեկցիաների դեմ կանխարգելիչ միջոցառումների կարևորությանը: Դիֆթերիան ընթանում է սովորական անգինաների կամ վերին շնչուղիների կատարի ձևով, իսկ հետագա զարգացումները բերում են մի շարք բարդությունների, որոնցից խուսափելու համար կոչ ենք անում պատվաստվել:

–   Պատվաստումից բարդություններ և ռեակցիաներ հաճա՞խ են հանդիպում, կա՞ն հակացուցումներ:

–   Պատվաստումից հետո կարող են լինել սովորական բարդություններ: Դրանցից է մի քանի օր տևող ջերմության բարձրացումը, որը բնականոն ընթացք է և անցնում է առանց հետևանքների: Քրոնիկ հիվանդները պետք է բժշկին տեղեկացնեն հիվանդությունների մասին, որպեսզի պատվաստումից հետո սրացումներ չլինեն: Հակացուցում կարող են լինել սրացման փուլում գտնվող որոշ քրոնիկ ծանր հիվանդությունները:

–   Պատվաստումները կամավո՞ր են: Կա՞ն հրաժարվողներ:

–   Իհարկե՛, դա յուրաքանչյուրի ցանկությամբ է իրականացվում: Մենք բացատրում, տեղեկացնում ենք պատվաստման կարևորության մասին, բայց մարդիկ ազատ են իրենց որոշման մեջ: Վստահեցնում եմ, որ մեր կլինիկայում հրաժարվողներ չկան:

Հարցեր, պատասխաններ, մեկնաբանություններ