ԵՊԲՀ. Մեծ Բրիտանիայում ԵՊԲՀ շրջանավարտների միության ներքո համախմբվում են աշխարհի տարբեր բժիշկներ

Արդեն 4 տարուց ավելի Մեծ Բրիտանիայում արդյունավետ գործունեություն է ծավալում ԵՊԲՀ շրջանավարտների միությունը, որի նախագահն է բժշկական բուհի հնդիկ շրջանավարտ Արուն Դաբասը։

Միջազգային գործունեության և արտաքին կապերի գծով պրոռեկտոր Երվանդ Սահակյանի ջանքերով ստեղծված կառույցը հնարավորություն է ընձեռում կապ հաստատել ԱՄՆ-ում, Բելգիայում, Լեհաստանում, Հնդկաստանում, Մեծ Բրիտանիայում, Ռուսաստանում, Ավստրալիայում, Նոր Զելանդիայում, Արաբական Միացյալ Էմիրություններում, Իրանում, Հայաստանում աշխատող ԵՊԲՀ շրջանավարտների, ինչպես նաև շրջանավարտ չհանդիսացող անվանի բժիշկների հետ և համախմբել նրանց։

Միացյալ Թագավորությունում ԵՊԲՀ շրջանավարտների միության ղեկավար Արուն Դաբասն ընտանեկան բժիշկ է։

45-ամյա մասնագետը 1994-2000 թթ․ սովորել է բժշկական բուհում։ Այնուհետև վերադարձել է Հնդկաստան և վերապատրաստվել այնտեղ։ Համապատասխան քննությունները հանձնելով՝ արդեն 2004 թվականին նրան հաջողվեց աշխատանքի անցնել Մեծ Բրիտանիայում։

2013 թվականին Արուն Դաբասը վերապատրաստվեց Ուելսի Կարդիֆի համալսարանում՝ մաշկաբանության ոլորտում, 2018 թվականին՝ Ստաֆորդշիրի համալսարանում՝  հոգեկան առողջության ոլորտում։

Այժմ նա Ուորվիկի բժշկական դպրոցում կլինիկական դասախոս է, համայնքային ծառայությունների կլինիկական առաջնորդ «Քավենթրի և Ուորվիկշիր գործընկերային վստահություն» կազմակերպությունում, որը մասնագիտացած է հոգեկան առողջության բնագավառում ծառայություններ մատուցելու և վերապատրաստելու ոլորտներում։     

«Սկզբում ուզում էի ֆուտբոլիստ դառնալ։ ԵՊԲՀ-ում ֆուտբոլի հնդկական թիմի ավագն էի։ Այն ժամանակ մեր թիմը միակն էր, որ մրցաշարում առաջին տեղը զբաղեցրեց», - հարազատ համալսարան կատարած հերթական այցի ընթացքում ոգևորությամբ հիշում է Արուն Դաբասը։

Ավագ քույրը ևս բժշկական բուհի շրջանավարտ է և նույնպես աշխատում է Մեծ Բրիտանիայում։ Կինը ստոմատոլոգ է, ունի 2 երեխա՝ 11 տարեկան տղա և 6 տարեկան աղջիկ։

Իր մասին Արուն Դաբասը շատ չի խոսում, փոխարենը ոգևորված պատմում է Անգլիայում ԵՊԲՀ շրջանավարտների միության ստեղծման մասին։

«Ուսումնառության տարիներին շատ սիրեցի Հայաստանը։ Որպես բժիշկ կայանալու իմ ուղին մեկնարկեց Երևանում, շարունակվեց Հնդկաստանում, և այժմ ես Միացյալ Թագավորությունում եմ։ Շատ եմ ուզում իմ կապերի շնորհիվ աջակցել Հայաստանում կրթություն ստացող տեղացի և օտարերկրացի ապագա բժիշկներին՝ ապահովելով նրանց առաջընթացը և ամուր կապը միմյանց հետ, ինչպես նաև համալսարանական մասնագետների վերապատրաստման և փորձի փոխանակման հնարավորությունը եվրոպական այս զարգացած երկրում», - ասում է Արուն Դաբասը։

2015 թվականին Օքսֆորդում նա հանդիպեց Միջազգային գործունեության և արտաքին կապերի գծով պրոռեկտոր Երվանդ Սահակյանին։

«Պրոռեկտորը մեզ համար միշտ ծնողի պես էր, անսահման երախտագիտության զգացում ունենք նրա հանդեպ։ Աշխարհի ոչ մի համալսարանում նման բան չկա։ Հենց Օքսֆորդում էլ որոշեցինք կյանքի կոչել նոր, շատ կարևոր նախաձեռնություն։ Երեք տարի անց՝ 2018 թվականի սեպտեմբերի 10-ին, մենք արդեն պաշտոնապես հիմնեցինք ԵՊԲՀ շրջանավարտների միությունը Միացյալ Թագավորությունում», - նշում է Արուն Դաբասը։

Սկզբում միությունը կազմված էր 12 շրջանավարտից, այժմ այն ունի արդեն 38 անդամ։ Նրանց թվում՝ ընտանեկան բժիշկներ, ակնաբույժներ, սրտաբաններ, օրթոպեդներ, ուրոլոգներ, գինեկոլոգներ, ռադիոլոգներ։

«Տարբեր նեղ մասնագիտացումների տեր բժիշկներ համախմբվեցին մեկ գաղափարի՝ Շրջանավարտների միության ներքո։ Կառույցի անդամ հանդիսացող ԵՊԲՀ հնդիկ շրջանավարտներից մեկը, որը շատ լավ խոսում է հայերեն, այժմ աշխատում է Ժնևում, Կարմիր խաչի գրասենյակում», - հավելում է Արուն Դաբասը։

Կառույցը, նրա խոսքով, սերտորեն համագործակցում է նաև Մեծ Բրիտանիայում գործող ճանաչված հայ բժիշկների հետ։   

«Պլանավորում ենք ստեղծել Շրջանավարտների միության կայք, որի միջոցով կհեշտանա թե՛ կապի հաստատումը, թե՛ անհրաժեշտ տեղեկատվության տարածումը։ ԵՊԲՀ կարիերայի կենտրոնի հետ համագործակցելով՝ Մեծ Բրիտանիայում աջակցում ենք շրջանավարտների սերունդներին, որոնք ցանկանում են բժշկական կրթություն ստանալ մեր բուհում, օգնում ենք ուսանողներին աշխարհի տարբեր անկյուններից տեղեկանալ Հայաստանի և բժշկական համալսարանի մասին, իսկ ուսման ավարտից հետո նպաստում ենք Միացյալ Թագավորությունում աշխատանք գտնելուն, կապեր հաստատելուն», - ասում է Արուն Դաբասը։

Անգլիայում բժշկական բուհի Շրջանավարտների միությունը կազմակերպում է նաև գործնական դասընթացներ տեղացի ուսանողների համար։

«Նրանց գործնական հմտությունների զարգացմանն աջակցում են բժշկական համալսարանաի շրջանավարտները, որոնք, իրենց հերթին, աշխատանքային փորձ ձեռք բերելու հնարավորություն են ստանում», - ավելացնում է Շրջանավարտների միության նախագահը։ 

Հարցեր, պատասխաններ, մեկնաբանություններ