Անվանի պրոֆեսոր Հերվե Ֆերնանդեսին շնորհվեց ԵՊԲՀ պատվավոր դոկտորի կոչում

Գիտական խորհրդի արտահերթ նիստի ընթացքում ԵՊԲՀ պատվավոր դոկտորի կոչում շնորհվեց ֆրանսիացի բժիշկ, Փարիզի «Կրեմլին-Բիսետրե» համալսարանական մանկաբարձագինեկոլոգիական կլինիկայի պրոֆեսոր Հերվե Ֆերնանդեսին:

«Համալսարանի Գիտական խորհրդի նախագահին դիմել էր պրոֆեսոր Օկոևը՝ միջնորդությամբ, որպեսզի Նոմինացիոն կոմիտեն քննարկի աշխարհահռչակ գիտնական, Ֆրանսիայի և աշխարհի գինեկոլոգիայի ասպարեզում մեծ ավանդ ունեցող պրոֆեսոր Ֆերնանդեսին պատվավոր դոկտորի կոչում տալու հարցը», - նշեց ԵՊԲՀ գիտության գծով պրոռեկտոր Կոնստանտին Ենկոյանը` հավելելով, որ Հերվե Ֆերնանդեսը ԵՊԲՀ մասնագիտական և շարունակական կրթության կենտրոնի մանկաբարձության և վերարտադրողական բժշկության ամբիոնին օժանդակել է վերարտադրողական բժշկության բնագավառում օպերատիվ վիրաբուժական նոր մեթոդների ներդրման գործում:

Նոմինացիոն կոմիտեն միջնորդեց պրոֆեսոր Գեորգի Օկոևի` արտերկրի գործընկերոջը պատվավար դոկտորի կոչում շնորհելու առաջարկը:

«Այնպես ստացվեց, որ 13 տարի առաջ մեր աշխատակիցներից մեկը մեկնել էր Ֆրանսիա, իրեն հյուրընկալել էր պրոֆեսոր Ֆերնանդեսը և այնպես էր հյուրընկալել, որ հետագայում հաճախակի դարձան նրա այցերը Հայաստան: Ամեն տարի, բացառությամբ քովիդային տարիների, նա գալիս էր վիրահատությունների նորագույն մոտեցումների ներդրման ցանկությամբ», - գործակցության մանրամասները ներկայացնելով՝ ասաց Մանկաբարձության և վերարտադրողական բժշկության հետբուհական ամբիոնի վարիչ  Գեորգի Օկոևը:

Շնորհավորելով անվանի բժիշկ-գիտնականին՝ ԵՊԲՀ ռեկտոր Արմեն Մուրադյանն ընդգծեց․

«Մեզ համար, անշուշտ, հիշարժան օր է․ ևս մեկ անգամ բժշկական համալսարանը հաստատեց նորությունների և նորարարությունների ստեղծարար միտքը հարգելու իր որդեգրած քաղաքականությունը, ինչպես նաև հայ-ֆրանսիական ամուր բարեկամական կապերին իր նվիրվածությունը»։

Ռեկտորը հույս հայտնեց, որ պրոֆեսորի այցերը բժշկական բուհ և վիթխարի փորձի փոխանակմանն ուղղված քննարկումներն ավանդական կդառնան, իսկ միջոցառմանը ներկա ապագա բժիշկները հետագա գործունեության մեջ ևս կամրապնդեն հայ և ֆրանսիացի ժողովուրդների բարեկամությունը:

ԵՊԲՀ արդեն պատվավոր դոկտոր Հերվե Ֆերնանդեսը նշեց, որ իր համար մեծ պատիվ է համալրել բժշկական մեկդարյա բուհի ներկայացուցչական այս ցանկը:

«Տասը տարի շարունակ հայ գործընկերների հետ հնարավորություն եմ ունեցել քննարկելու ոլորտի խնդիրները և ապագայում ևս կշարունակեմ լավագույն խորհուրդներով նպաստել ձեր մասնագիտական առաջընթացին: Ես ինձ միշտ մոտ եմ զգացել հայ ժողովրդին` հաշվի առնելով իմ հունական արմատները», - ասաց պրոֆեսորը, որի  մոր հույն ընտանիքը շատ հայերի նման Թուրքիայից տեղահանվել և ապաստան է գտել Ֆրանսիայում:

Հերվե Ֆերնանդեսը վերահաստատեց ֆրանսիական «Կրեմլին-Բիսետրե» համալսարանի պատրաստակամությունը՝ շարունակելու բժշկական համալսարանի ու հայ գործընկերների հետ համագործակցությունը նոր մակարդակում:

Հանդիսավոր նիստին հաջորդեց պրոֆեսորի դասախոսությունը  մանկաբարձության և գինեկոլոգիայի ոլորտի գործող և ապագա մասնագետների համար:

Հարցեր, պատասխաններ, մեկնաբանություններ