Գլխուղեղի ուռուցքներ․ ախտորոշում և բուժում «Նաիրի» ԲԿ-ում և «Էրեբունի» ռադիոթերապիայի կենտրոնում. nairimed.com

Գլխուղեղի ուռուցքները կարող են լինել թե՛ բարորակ, թե՛ չարորակ։ Սակայն նույնիսկ բարորակ գոյացությունները կարող են վտանգավոր լինել, քանի որ ճնշում են գլխուղեղի կենսական հատվածները։ Ուռուցքների բուժման ռազմավարությունն ընտրվում է մի քանի գործոններից ելնելով՝ տեսակը, չափսը, տեղակայումն ու զարգացվածության աստիճանը։

Ախտորոշում և բիոպսիա

Ուռուցքի տեսակի հստակեցման համար հիմնականում իրականացվում է բիոպսիա։ Այս գործընթացն իրականացվում է ստերեոտակտիկ համակարգի կամ նեյրոնավիգացիայի կիրառմամբ՝ կախված դեպքից։ Նեյրոնավիգացիան օգտագործվում է նաև վիրահատությունների ժամանակ՝ ապահովելով առավելագույն ճշգրտություն։

«Նաիրի» ԲԿ-ի նյարդաբանության և նյարդավիրաբուժության ծառայության ղեկավար Արման Հակոբյանը նշում է․
 «Նեյրոնավիգացիան թույլ է տալիս վիրահատության ընթացքում հստակ որոշել ուղին դեպի ուռուցք, սահմանել դրա ծավալը և խուսափել գլխուղեղի առողջ հյուսվածքների վնասումից։ Սա հատկապես կարևոր է չարորակ ուռուցքների դեպքում, որոնք իրենց գույնով չեն տարբերվում ուղեղի այլ հատվածներից»։

Վիրահատական միջամտություն և նեյրոմոնիթորինգ

Վիրահատությունների ընթացքում բժիշկներին աջակցում է նեյրոմոնիթորինգը՝ գլխուղեղի աշխատանքը վերահսկող հատուկ համակարգ, որը կանխում է շարժողական կամ այլ կենսական կենտրոնների վնասումը։

«Եթե վիրահատության ընթացքում մոտենում ենք կենտրոնի, որը պատասխանատու է, օրինակ, ձեռքի կամ ոտքի շարժման համար, սարքը մեզ թույլ է տալիս խուսափել այդ կենտրոնի վնասումից»։

Ճառագայթային և դեղորայքային բուժում

Ոչ բոլոր գլխուղեղի գոյացություններն են ենթակա վիրահատության։ Որոշ դեպքերում, հատկապես երբ ուռուցքը դժվար հասանելի հատվածում է, կիրառվում է դեղորայքային կամ ճառագայթային բուժում՝ անգամ բարորակ գոյացությունների դեպքում։ Ճառագայթային թերապիան կարող է օգտագործվել նաև վիրահատությունից հետո՝ հիվանդության կրկնության կանխարգելման նպատակով։

«Էրեբունի» ռադիոթերապիայի կենտրոնի ռադիոթերապիայի բաժնի ղեկավար Սերգեյ Գոլուբ ասում է․
 «Բուժումը սովորաբար ներառում է 25-30 սեանս, որոնք անցկացվում են ամեն օր՝ երկուշաբթիից ուրբաթ։ Տևողությունը մոտ մեկից մեկուկես ամիս է։ Այս կուրսերի համար օգտագործում ենք Varian Halcyon սարքը, որն ապահովում է բարձր ճշգրտություն և արդյունավետություն»։

Բարորակ ուռուցքների՝ ինչպես շվանոմաների, հիպոֆիզի ադենոմաների և մենինգիոմաների դեպքում, ճառագայթային բուժումը միշտ չէ, որ անհրաժեշտ է։ Այն կարող է առաջարկվել որպես նյարդավիրաբուժական միջամտության այլընտրանք։

Ռադիովիրաբուժություն՝ մետաստատիկ ուռուցքների դեպքում

Երբ գլխուղեղի մեջ ախտահարում է տեղի ունենում այլ օրգաններից մետաստազավորված ուռուցքների պատճառով, կիրառվում է ամենաժամանակակից մեթոդներից մեկը՝ ստերեոտակտիկ ռադիովիրաբուժություն։

«Էրեբունի» ռադիոթերապիայի կենտրոնի ճառագայթային թերապևտ Ստանիսլավ Սմոլնիկովը նշում է․
 «Սա մեթոդ է, որը ներառում է բարձր դոզայով իոնացնող ճառագայթման ուղարկում՝ մեծ ճշգրտությամբ։ Սեանսների քանակը՝ 1-5։ Նախքան բուժումը կատարվում է նշագծում, ՄՌՏ-ով մանրամասն շերտագրություն, դոզիմետրիկ պլանավորում՝ բժշկական ֆիզիկոսների մասնակցությամբ»։

Ռադիովիրաբուժությունն իրականացվում է ամբուլատոր պայմաններում, սեանսը տևում է 30-40 րոպե և ամբողջությամբ անցավ է։ Այս մեթոդը զգալիորեն ավելի անվնաս է, քան գլխուղեղի ամբողջական ճառագայթումը։

«Նաիրի» բժշկական կենտրոնը և «Էրեբունի» ռադիոթերապիայի կենտրոնը հագեցած են ժամանակակից տեխնոլոգիաներով՝ սկսած ճշգրիտ ախտորոշումից մինչև ամենանորարարական բուժման մեթոդները։ Մեր մասնագետները տրամադրում են ամբողջական մոտեցում՝ բիոպսիայից մինչև ռադիովիրաբուժություն՝ ապահովելով հիվանդների անվտանգությունն ու կյանքի որակի բարելավումը։

Հարցեր, պատասխաններ, մեկնաբանություններ