Սրտի, որպես մխոցի, արյան նորմալ շրջանառությունն ապահովող գործունեության անկարողությունն է։ Սրտային անբավարարությունն ի հայտ է գալիս սրտամկանի, թոքերի տարածուն ախտահարումների, պերիկարդիտների, զարկերակային հիպերտենզիայի, սրտի արատների և այլ ախտաբանական վիճակների դեպքում, որոնք դժվարացնում Են սրտի աշխատանքը։

Սրտային սուր անբավարարությունը զարգանում է սրտի ձախ փորոքային սուր անբավարարության հետևանքով թոքային հյուսվածքում շճային հեղուկի արտազատումով (ինտերստիցիալ այտուց)։

Սրտային քրոնիկական անբավարարությունը բնորոշ է միտրալ (երկփեղկ) և տրիկուսբիդալ (եռփեղկ) փականների արատներին, կպչող պերիկարդիտին։ Այն հաճախ զուգորդվում է ձախփորոքային անբավարարությամբ։

Կլինիկան։ Պարանոցային երակների արտափքում, բարձր երակային ճնշում, ակրոցիանոզ, լյարդի մեծացում, այտուց, դեղնություն, ջրգողություն։ Փոփոխությունները սրտի կողմից՝ սրտի սահմանների մեծացում, կարդիոմեգալիա, ռիթմի խանգարում, նախասիրտ-փորոքային բլոկադա։

Բուժումը։ Սրտային անբավարարության բուժումը կախված է նրա բնույթից և արտահայտվածության աստիճանից։ Բուժումը հիմնականում տարվում է սրտի կծկողական ունակության բարձրացման, ներքին օրգանների ֆունկցիայի նորմալացման և արյան հավասարակշռության (հոմեոստազի) վերականգնման ուղղությամբ։ Անբավարարության բուժման հիմնական սկզբունքներն են՝ կազմակերպել ճիշտ ռեժիմ և խնամք, դիետաթերապիա, դեղորայքային բուժում։ Անհրաժեշտ է նաև պարզել և բուժել առաջացնող պատճառները (ռևմատիզմ, միոկարղիտ)։ Հիմնական դերը պատկանում է ռացիոնալ դեղորայքային բուժմանը։ Առաջին հերթին նշանակվում է սրտային գլիկոզիդներ։ Անկախ պատրաստուկի ձևից և բնույթից գլիկոզիդները միանման ազդեցություն են թողնում սրտամկանի վրա, ուժեղացնում են միոկարդի կծկողական ունակությունը՝ առանց մեծացնելու պահանջը թթվածնի նկատմամբ։ Գլիկոզիդներ նշանակելիս հաշվի պետք է առնել սրտային անբավարարության աստիճանը, ինչպես նաև դեղամիջոցի ազդեցության արագությունը՝ ինչքան ժամանակում կառաջանա առավելագույն թերապևտիկ արդյունք։ Սրտային անբավարարության II և III աստիճանների ժամանակ գլիկոզիդները նշանակվում են միայն ներերակային ձևով։

Գլիկոզիդների hետ միասին նշանակվում են նաև միզամուղներ։ Սրտամկանի սնուցումը լավացնելու համար նշանակվում է կոկարբոքսիլազա, կալիումի պատրաստուկներ, վիտամինաթերապիա։

Կլինիկական մանկաբուժություն
Վ.Ա. Աստվածատրյան
Տեղեկատվություն. med-practic.com