Հարգելի Albina, բարև Ձեզ: Դատելով նշանակված բուժումից, Ձեզ մոտ բակտերիալ վագինոզ է: Նշանակված միջոցները էֆեկտիվ են,  և հղիության ընթացքում կարելի է օգտագործել, վտանգավոր չէ պտղի համար:

Հարգելի Մարգարիտ, բարև Ձեզ: Արտադրության պատճառը պարզելու համար հարկավոր է հանձնել քսուք: Ենթադրություններ անելը, առավել ևս որևէ բուժում նշանակելը, կարծում եմ խելամիտ չէ: Կարող եք կատարել լվացումներ հակասեպտիկ լուծույթներով, օրինակ երիցուկի թուրմով, կալիումի պերմանգանատի թույլ լուծույթով, սոդայաջրով և այլն: Սակայն դա բուժում չէ ուղղակի ժամանակավորապես կմեղմացնի վիճակը: Վերջնական բուժման համար այնուամենայնիվ հարկավոր է դիմել բժշկի:

Հարգելի Nane Antonyan, բարև Ձեզ: Հեշտոցում սնկերի զարգացման հիմնական պատճառը հեշտոցի միկրոֆլորայի խախտումն է, այսինքն խնդրից ազատվելու համար հարկավոր է նախ կարգավորել հեշտոցի միկրոֆլորան: Բացի հակասնկային մոմիկներից հարկավոր է նաև օգտագործել պրոբիոտիկներ, տեղային մոմիկների և ներքին ընդունման ձևով: Դեղորայքային բուժման համար հարկավոր է դիմել գինեկոլոգի:

Հարգելի Ina, բարև Ձեզ: Հեշտոցային արտադրությունն առանց պատճառի չի կարոզ լինել, հարկավոր է հետազոտվել և պարզել պատճառը: Ինչ վերաբերում է տուբերկուլյոզին. տուբերկուլյոզը սեռական ճանապարհով չի փոխանցվում, այն մեծ մասամբ փոխանցվում է օդա-կաթիլային, կոնտակտային ճանապարհով: Եթե ընտանիքում կա տուբերկուլյոզով հիվանդ մարդ, վարակվելու հավանականությունը շատ ավելի մեծ է: Հարկավոր է, որ Դուք ևս հետազոտվեք: Պետք է նշել, որ միզասեռական համակարգի տուբերկուլյոզի բարդություններից մեկը անպտղությունն է: Ինչ վերաբերում է հիվանդ մորից հիվանդության փոխանցմանը, միանշանակ ասել, որ կփոխանցվի չի կարելի, սակայն հավանականությունը շատ մեծ է: Նման դեպքերում ավելի անվտանգ է փոխնակ մոր ծառայությունից օգտվելը, և ապագա երեխայի և մոր առողջության համար:

Հարգելի ANI M, բարև Ձեզ: Պատճառը պարզելու համար հարկավոր է հեշտոցի քսուք հանձնել: Իհարկե, եթե ամուսնու մոտ եղել է սնկային ախտահարում, մեծ հավանականություն կա, որ Ձեզ մոտ ևս առկա է նույն խնդիրը: Ինչ վերաբերում է սոդայաջրով լվացումներին, դա բուժում չէ, ուղղակի ժամանակավոր կմեղմացնի քորն ու այրոցը: Հարկավոր է գինեկոլոգի կոնսուլտացիա:

Հարգելի Sofia, բարև Ձեզ: Պտղի ներարգանդային աճի դանդաղման դեպքում բացի դեղորայքային բուժումից,  շատ կարևոր է համապատասխան սնունդը, շնչառական վարժությունները, զբոսանքը, ֆիզիկական ակտիվությունը: Հարկավոր է ընդունել վիտամիններով, միներալներով, սպիտակուցներով և ածխաջրերով հարուստ  սնունդ: Ածխաջրերը թերևս ամենակարևորն են: Վիտամիններից շատ կարևոր է վիտամիններ Ց-ն և Ե-ն: Օգտագործեք շատ մրգեր, բանջարեղեն, կաթնամթերք, ձու և հատիկավորներ, որոնք ածխաջրերի հարուստ աղբյուր են: Ստորև ներկայացնում ենք կայքի հղում, որտեղ կգտնեք պտղի ներարգանդային աճի դանդաղման դեպքում հղիին անհրաժեշտ սննդամթերքների ցանկը, ըստ հղիության ժամկետի.

http://mama66.ru/pregn/819

Հարգելի Lusine, բարև Ձեզ: Եթե արտադրությունը շարունակվում է, հատկապես, եթե ձեռք է բերել կարմրավուն երանգ կամ ալ կարմիր, հարկավոր է դիմել բժշկի: Դա վիժման սպառնալիքի նշան է:

Հարգելի Diana, բարև Ձեզ: Եթե քսուկի փոխարեն մոմիկներն եք օգտագործել, ոչ մի խնդիր չի լինի, երկու դեպքում էլ բաղադրությունը  նույնն է: Ինչ վերաբերում է սեռական կյանքին, բուժման ընթացքում ընդհանրապես ցանկալի չէ հարաբերություն ունենալ, եթե այնուամենայնիվ հնարավոր չէ, հարկավոր է անպայման պաշտպանվել: Նույնը վերաբերում է նաև բուժումից հետո, այնքան ժամանակ, քանի դեռ լիարժեք չեք բուժվել:

Հարգելի Ani, բարև Ձեզ: CIN1- -ը դա արգանդի պարանոցի դիսպլազիայի առաջին աստիճանն է, որի դեպքում հիմնականում վիրահատական միջամտության կարիք չի լինում: Հարկավոր է 3-4 ամիսը մեկ կատարել բջջաբանական հետազոտություն, ստանալ հակավիրուսային և իմունոմոդուլյատոր բուժում: Հղիանալուն և ծննդաբերելուն դա չի խանգարի: Ուղղակի ինչպես նշեցի հարկավոր է դինամիկ հսկողություն, եթե նկատվի առաջընթաց, այդ դեպքում հնարավոր է վիրահատական միջամտության կարիք լինի:

Հարգելի Lusine, բարև Ձեզ: Հնարավոր է լորձային արտադրությունը կապված չէ բորբոքման հետ, ցանկալի է գինեկոլոգիական զննում: Լորձային արդատրություն նկատվում է արգանդի պարանոցի էրոզիայի, հիպերտրոֆիայի ժամանակ: Ինչ վերաբերում է դաշտանային ցիկլի խանգարմանը, խնդրում եմ գրեք որքան ժամանակ է,  և դրանից առաջ ինչ դեղորայք եք ստացել: Հնարավոր է կապված է ստացած բուժման հետ:

Հարգելի Anna, բարև Ձեզ: Եթե օգտագործում եք պահպանակ, հնարավոր է ուղղակի ալերգիկ ռեակցիա է լատեքսից: Հարաբերությունից հետո, կարող եք լվացում անել երիցուկի թուրմով: Եթե քորը և այրոցը շարունակվեն, դիմեք բժշկի:

Հարգելի Arina, բարև Ձեզ: Ամենայն հավանականությամբ, դա ոչ թո հեշտոցի վրա է, այլ ցայլքի շրջանում կամ սեռական շրթերին: Կարող է լինել ճարպագեղձի կամ մազապարկի բորբոքում: 

Հարգելի Ani, բարև Ձեզ: Նախ պետք է համոզվել պատճառն ուրեոպլազման է, թե ոչ: Դրա համար հարկավոր է հանձնել քսուք, և բակ- քննության և ՊՇՌ-ի համար: Ուրեպլազմոզն առաջացնում է հավելումների` արգանդափողերի և ձվարանների բորբոքում, կարող է բերել ինքնաբեր վիժման և չբերության: Բուժում ստանալ միանշանակ հարկավոր է: Ուրեպլազման ախտորոշվում է ՊՇՌ-ի մեթոդով, այո քսուքի միջոցով կարելի է ախտորոշել:

Հարգելի Anush Ghazaryan, բարև Ձեզ: Կոնքազրային հոդի շրջանի ցավերի համար հարկավոր է դիմել օրթոպեդի: Ինչ վերաբերում է գինեկոլոգիական խնդիրներին. Ձեր գրածից պարզ չէ, բորբոքման պատճառը որն է: Սնկերի դեպքում նշանակված մոմիկներն ու ֆլուկոնազոլը էֆեկտիվ են, ինչ վերաբերում է մնացյալին, ենթադրություններ անել պետք չէ անել: Կարծում եմ Ձեր բժիշկն ավելի լավ է տիրապետում իրավիճակին և համապատասխան բուժում է նշանակել: