Տաղանդավոր գիտնական և հմուտ կազմակերպիչ, բժշկական գիտությունների ակադեմիայի իսկական անդամ, պրոֆեսոր Անդրեյ Արկադիի Բաղդասարովը գիտության նորարար էր: Իր ղեկավարած կենտրոնի գիտական հետազոտությունները վերաբերում են բժշկության առավել արդի ուղղությունների մշակմանը:

Ա.Ա.Բաղդասարովը ծնվել է 1897թ. Խարկովում: 1916թ. Ա.Բաղդասարովը ավարտում է Թիֆլիսի 4-րդ վարժարանը և ընդունվում Սարատովի համալսարանի բժշկական ֆակուլտետը: 1922թ. մեկնում է Մոսկվա ուսումը շարունակելու, սկզբում որպես Մոսկվայի 2-րդ պետական համալսարանի բժշկական ֆակուլտետի ուսանող, ապա ասպիրանտ, ասիստենտ և պրիվատ -դոցենտ, միաժամանակ շարունակելով նաև կուսակցական աշխատանքը: Մոսկվայի 2-րդ պետական համալսարանի թերապևտիկ կլինիկայում նա հասավ պրոֆեսորից մինչև ամբիոնի վարիչ: 1931թ. Առողջապահության ժողկոմիսարիատի կողմից Ա.Բաղդասարովը նշանակվում է Արյունաբանության և արյան փոխներարկման ինստիտուտի տնօրեն և գլխավոր արյունաբան: Անգնահատելի է Ա.Ա. Բաղդասարովի դերը ֆիննական և Հայրենական պատերազմների ժամանակ տրանսֆուզիոն բուժօգնության կազմակերպման գործում:

Ա.Բաղդասարովի եռանդուն գործունեությանը մեծապես նպաստեց երկրում արյան ծառայության հաստատությունների ճյուղավորված ցանցի ստեղծումն ու զարգացումը: Այն ներառում էր կենտրոնական ինստիտուտի մասնաճյուղերը, հենակետերը և արյան փոխներարկման կայանները: Շատ կարճ ժամանակահատվածում` 1931-1936թթ. երկրում բացվեցին կենտրոնական ինստիտուտի 50-ից ավելի մասնաճյուղեր` Խարկովում, Լենինգրադում, Բելոռուսում, Կիևում, Թիֆլիսում, Երևանում և այլն, որոնք ունեին ավելի, քան 600 հենակետեր:

Արյան պահածոյացման, արյան շիճուկի և արյան պատրաստուկների ստացման համար Ա.Ա.Բաղդասարովին երկու անգամ շնորհվել է Պետական մրցանակ (1946 և 1952), նա նաև պարգևատրվել է Լենինի շքանշանով: Արյունաբանության և արյան փոխներարկման կենտրոնական ինստիտուտի աշխատանքները բարձր գնահատականների են արժանացել Արյունաբանների միջազգային համաժողովներում` Իտալիայում, Ֆրանսիայում, Լեհաստանում, Գերմանիայում և այլ երկրներում: Բազմիցս այդ խոշոր ֆորումներում խորհրդային բժշկությունն է ներակայացրել Արյունաբանության և արյան փոխներարկման միջազգային և եվրոպական միությունների կառավարման անդամ Անդրեյ Արկադիի Բաղդասարովը:

Ա.Բաղդասարովի գիտակազմակերպչական աշխատանքը նպաստել է Խորհրդային Միության տարբեր հանրապետություններում արյունաբանական բաժանմունքների ստեղծմանը: Անփոխարինելի է նրա վաստակը Խորհրդային Միությունում ՙԱրյունաբանության և արյան փոխներարկման հիմնախնդիրները՚ առաջին ամսագրի ստեղծման գործում, որի անփոփոխ խմբագիրն էր երկար տարիներ: