25 ակումբը երիտասարդական միավորում է, որը քարոզում է կյանքեր փրկել արյուն հանձնելու միջոցով: 25 ակումբի շրջանակներում երիտասարդները հնարավորություն ունեն այցելել արյան կայաններ, սովորել առողջ ապրելակերպի սկզբունքները` նպատակ հետապնդելով մինչև 25 տարին լրանալը կատարել առնվազն 20 արյունատվություն:

25 ակումբը սկիզբ է առել Զիմբաբվեում, 1989թ.: Ակումբի թիրախ խումբը երիտասարդներն էին, ովքեր դպրոցն ավարտելուց հետո պետք է կատարեին 25 արյունատվություն: Ակումբի անդամներին տրվում էին կրթական նյութեր, երիտասարդներն իրենք անցկացնում էին ուսուցողական սեմինարներ և շուտով միմյանց սատար կանգնելը և հասարակությանն օգնելը ակումբի անդամների համար դարձավ առաջնային:

25 ակումբի գաղափարը շատ արագ տարածում գտավ ոչ միայն աֆրիկյան երկրներում, այլև ամբողջ աշխարհում, և այժմ ՙ25 ակումբներ՚  գործում են աշխարհի ավելի քան 100 երկրներում (Անգլիա, Ֆինլանդիա, Շվեյցարիա, Հնդկաստան և այլն):

Հայաստանի հանրապետությունում 25 ակումբը գործում է 2007թ. նոյեմբեր ամսից: Տեղեկանալով աշխարհի բազմաթիվ երկրներում ՙ 25 ակումբի՚ գոյության մասին, տարբեր մասնագիտությունների տեր երիտասարդները, որոնց թվում` մանկավարժներ, բժիշկներ, հոգեբաններ, նկարիչներ, ձեռնամուխ եղան Հայաստանում ևս ստեղծել մի խումբ, որը կզբաղվի կամավոր անվարձահատույց դոնորության քարոզչությամբ, արյան և արյան բաղադրամա սերի հավաքագրմամբ: Հայաստանի 25 ակումբի անդամների կողմից ուսումնասիրվեց այդ դաշտը, նամակագրական կապ հաստատվեց Շվեյցարիայում Կարմիր Խաչի կազմակերպության, Միջազգային Արյան բանկի հետ: Նրանց կողմից ևս քաջալերվեց հայաստանյան 25 ակումբի գործունեությունը, ուղարկվեցին մեթոդական ձեռնակրկներ, ուսուցողական նյութեր, որոնք մեծ օգնություն հանդիսացան նորաստեղծ ակումբի համար:

Հայաստանյան 25 ակումբի սկզբնական խնդիրներն են ուսումնասիրել, գնահատել և հիմնավորել ՀՀ-ում իրականցվող դոնորությունը որպես հանրային առողջապահության խնդիր, հայ երիտասարդների մեջ դաստիարակել անվարձահատույց կամավոր դոնորության գաղափարական արժեքները, տրամադրել տեղեկատվական նյութեր արյան և արյան բաղադրամասերի դոնորության վերաբերյալ, ընդլայնել ակումբի գործունեության շրջանակաները նաև ՀՀ բոլոր մարզերում: