Հեշտանքի խանգարումներից է կանանց հեշտանքի խանգարումը (302.73), որը նախկինում կոչվում էր անօրգազմիա կամ արգելակված հեշտանք։ Բնութագրվում է ադեկվատ գրգռման դեպքում հեշտանքի մշտական ուշացումով կամ բացակայությամբ։ Այս խանգարման դեպքում կինը ի վիճակի է գրգռվելու, ունենալու լյուբրիկացիա և գրգռման սուբյեկտիվ զգացողություն, բայց անկարող է հասնելու հեշտանքի՝ չնայած ադեկվատ գրգիռների առկայությանը։ Տղամարդկանց հեշտանքի խանգարումը (302.74), որ հայտնի է ուշացած սերմնաժայթքում (ejaculatio tarda) անվանմամբ, արտահայտվում է ադեկվատ գրգռման փուլից հետո տղամարդու հեշտանքի մշտական ուշացումով կամ բացակայությամբ։ Վաղաժամ սերմնաժայթքումը (302.75) էյակուլյացիայի ռեֆլեքսի կառավարման անկարողությունն է, որի ժամանակ տղամարդը սովորաբար սերմնաժայթքում է գրգռման շատ կարճ ընթացքից հետո` շատ ավելի վաղ, քան ինքը կկամենար։ Վաղաժամ սերմնաժայթքումը երբեմն ախտորոշվում է` հաշվի առնելով իմիսիայի և հեշտանքի միջև ընկած ժամանակահատվածը կամ ճշտելով, թե հասցնու՞մ է արդյոք զուգընկերուհին բավարարվել սեռական հարաբերությունից։ Պետք է նշել, որ վերջին երկու մոտեցումներն էլ լիարժեք չեն, քանի որ չեն ելնում այս խանգարման հիմնական մեխանիզմից՝ սերմնաժայթքման կառավարումից։ Շատ տղամարդիկ գիտեն երկարաձգել հեշտանքը՝ նվազեցնելով գրգիռների աճման արագությունը։ Այս կերպ նրանց հաջողվում է կարգավորել իրենց գրգռման մակարդակը՝ ցածր պահելով այն սերմնաժայթքման անխուսափելության մակարդակից (այն պահը, երբ սկսվում է հեշտանքի ռեեֆլեքսը)։

Տե'ս նաև Սեքսոլոգիա: Հեշտանքի խանգարումներ

Հեղինակ. Արամ Հակոբյան, Նարինե Ներսիսյան
Աղբյուր. Կլինիկական սեքսոլոգիա
Տեղեկատվություն. sexology.am