Բժշկական ասոցիացիաների Եվրոպական ֆորումի և Առողջապահության համաշխարհային կազմակերպության ղեկավար կազմի համաժողովը Երևանում

Սույն թվականի ապրիլի 19-20-ը Երևանի «Արմենիա Մարիոթ» հյուրանոցի« Տիգրան Մեծ» դահլիճում Հայկական բժշկական ասոցիացիան կազմակերպել էր Բժշկական ասոցիացիաների եվրոպական ֆորումի (ԲԱԵՖ) և Առողջապահության համաշխարհային կազմակերպության (ԱՀԿ) ղեկավար կազմի համաժողով, որին մասնակցում էին ավելի քան 30 երկրների ազգային բժշկական ասոցիացիաների նախագահներն ու ներկայացուցիչները:

Մասնակիցների թվում էին Համաշխարհային բժշկական ասոցիացիայի գլխավոր քարտուղար, պրոֆեսոր Օտմար Կլոյբերը (Գերմանիա), Բժշկական ասոցիացիաների եվրոպական ֆորումի նախագահ Լիա Վապները (Իսրայել), Ռուսաստանի Դաշնության պատվիրակության ղեկավար, աշխարհում առաջին բժիշկ տիեզերագնաց պրոֆեսոր Օլեգ Ատկովը, Առողջապահության համաշխարհային կազմակերպության եվրոպական գրասենյակի ստորաբաժանումների ղեկավարները և հեղինակավոր այլ անձինք:

Նման համաժողովները տեղի են ունենում տարին մեկ անգամ` համապատասխան մրցույթով հաղթած երկրում: Հայկական բժշկական ասոցիացիայի նախաձեռնությամբ և հետևողական աշխատանքի շնորհիվ մեր երկրում առաջին անգամ անցկացվեց նման հեղինակավոր միջոցառում, որի կայացմանը նպաստեց նաև այն, որ Հայկական բժշկական ասոցիացիան ԲԱԵՖ-ի լիիրավ անդամ է, իսկ ասոցիացիայի նախագահ Պարունակ Զելվեյանը 2006թ.-ից` վերջինիս գործադիր մարմնի անդամ: 

ԲԱԵՖ-ը կարևոր դեր ունի ԱՀԿ և ազգային բժշկական ասոցիացիաների միջև արդյունավետ երկխոսության ու համագործակցության ապահովման, Եվրոպայում առողջության պահպանման ու առողջապահության կազմակերպման նոր մոդելների ներդրման և մատուցվող ծառայությունների որակի բարձրացման գործում, որը հնարավոր է դարձնում առողջապահական համապատասխան տեսակետների և մոտեցումների արագ ու արդյունավետ ինտեգրումը մասնակից երկրներում: 

ՀՀ առողջապահության նախարար Հարություն Քուշկյանը ողջունելով միջոցառման մասնակիցներին, նշեց, որ եվրոպական տարածաշրջանում բժշկական խնդիրները կարող են ակնհայտորեն բարելավվել առողջապահական քաղաքականության սկզբունքների ձևավորմամբ և երկրների առողջապահական համակարգերի առջև ծառացած խնդիրները միահամուռ ուժերով հաղթահարելու ճանապարհով:

ԲԱԵՖ նախագահ Լիա Վապները նշեց, որ ընթացիկ տարում յուրաքանչյուր երկիր իր մտահոգություններն ու տեսակետներն է արտահայտում առողջապահության համակարգի վրա տնտեսական ճգնաժամի ունեցած ազդեցության մասին: «Ազգաբնակչությունը ճգնաժամի ժամանակ ավելի շատ խնդիրներ է ունենում, և այդ առումով, առավելապես պետք է անդրադառնալ հանրային առողջապահության հարցերին ու առողջապահական քաղաքականությանը»,- ընդգծեց Լիա Վապները:

• տնտեսական ճգնաժամը և առողջությունը,
• առողջապահության սոցիալական որոշիչ գործոնները,
• ԱՀԿ 2020թ. ռազմավարությունը,
• ալկոհոլը և առողջությունը,
• հակածխախոտային քաղաքականությունը,
• ազգային բժշկական ասոցիացիաների դերակատարման բարձրացման հարցերը,
• բժշկական էթիկայի ներդրման և պահպանման մի շարք անկյունաքարային հարցեր,
• բուժաշխատողների շահերի պաշտպանությանն ուղղված մոտեցումները:

 

Քննարկվեցին նաև միջազգային առողջապահական ծրագրերին Հայաստանի Հանրապետության հնարավոր մասնակցության և ներգրավվման մի շարք հարցեր: 

  

ԲԱԵՖ եռօրյա ակտիվ աշխատանքների արդյունքում առաջարկվեցին և ընդունվեցին կարևոր որոշումներ, փաստաթղթեր, հուշագրեր, որոնք արդեն տարածվել են բժշկական ասոցիացիաների եվրոպական ֆորումի, ազգային ասոցիացիաների և ԱՀԿ տեղեկատվական միջոցներով:

 

«Հայաստանում այս խոշոր միջոցառման անցկացումը կարևոր իրադարձություն և մեծ ձեռքբերում է մեր իրականության համար»,- իր ելույթում նշեց ՀԲԱ նախագահ Պարունակ Զելվեյանը: 

 

   

Վեհաժողովի փակման արարողության ժամանակ բոլոր մասնակիցների կողմից բարձր գնահատական տրվեց ՀԲԱ-ի կատարած աշխատանքին` Երևանում միջոցառումը հավուր պատշաճի կազմակերպելու համար: 

Հարցեր, պատասխաններ, մեկնաբանություններ