Կայացավ «Դիմածնոտային շրջանի եռաչափ ռադիոախտորոշում. խորացված կուրս» սեմինարը

Մայիսի 4-5-ը  Երևանի Մոսկվայի տանը տեղի ունեցավ բժիշկ-ճառագայթաբան Դ. Վ. Ռոգացկինի «Դիմածնոտային շրջանի եռաչափ ռադիոախտորոշում. խորացված կուրս» խորագրով սեմինարը, որի ընթացքում ստոմատոլոգները, ռադիոլոգները և քիթ-կոկորդ-ականջ մասնագետները գիտելիքներ ստացան  ստոմատոլոգիայի և ռադիոլոգիայի ոլորտում վերջին կարևորագույն նվաճումներից մեկի` եռաչափ (3D) ռադիոախտորոշման մասին:

Սեմինարի մանրամասների մասին զրուցել ենք  սեմինարի կոորդինատոր, Էրեբունի բժշկական կենտրոնի ռենտգեն ծառայության ղեկավար Նաիրա Վազգենի Մինասյանի հետ:

–   Ո՞րն է սեմինարի բուն նպատակը, որքանով է այն արդիական: 

	Էրեբունի բժշկական կենտրոնի ռենտգեն ծառայության ղեկավար Նաիրա Վազգենի Մինասյան

–   Սեմինարը կազմակերպել է «Պրոգրես-Դենտ» ստոմատոլոգիական կենտրոնը նպատակ ունենալով հայ մասնագետներին, բժիշկներին, ուսանողներին, պարզապես հետաքրքրված անձանց ներկայացնել ստոմատոլոգիայի և ռադիոլոգիայի ոլորտների կարևորագույն նվաճումները, դրանց կիրառման հնարավորությունները պրակտիկ բժշկության մեջ: Թեման ընտրվել է այնպես, որ և´ ստոմատոլոգները, և´ ռադիոլոգները սեմինարից վերցնեն առավելագույն տեղեկատվություն, ծանոթանան ոլորտում կիրառվող նորագույն տեխնիկային և դրա կիրառման հնարավորություններին, ոլորտի արտասահմանյան փորձին: Սեմինարի ընդհանուր նպատակը Հայաստանում ստոմատոլոգիական ռադիոլոգիայի զարգացմանը նպաստելն է:

–   Ի՞նչ է ներկայացնում բանախոսը, ի՞նչ կտա այս սեմինարը մասնագետներին:

–   Սեմինարի բանախոսը, լինելով ստոմատոլոգ, և միաժամանակ ունենալով որակավորում ռադիոլոգիայի բնագավառում, կարևոր գիտելիքներ է փոխանցում մեր մասնագետներին, որոնք հավասարաչափ անհրաժեշտ են և´ ռադիոլոգներին, և´ ստոմատոլոգներին: Վերջիններս իմանալով ախտաբանությունը` դժվարանում են կողմնորոշվել համակարգչային տոմոգրաֆիայի պատկերների վերլուծության հարցում: Իսկ ռադիոլոգներն ընդհակառակը, խնդիր չունենալով ռենտգեն պատկերների ընդհանուր վերլուծության գործընթացում, դժվարանում են ախտաբանական հարցերում:  Բանախոսը նաև ներկայացնում է  դիմածնոտային, ստոմատոլոգիական ախտաբանությունը,  քիթ-կոկորդ-ականջ մասնագիտական խնդիրները, որոնք պատկերվում են նորաստեղծ  եռաչափ համակարգչային տոմոգրաֆիայի միջոցով, բացատրում է, թե ինչպես պետք է աշխատել տվյալ պատկերների հետ:  Սեմինարի ընթացքում մասնագետները կստանան նաև համակարգչային տոմոգրաֆիային վերաբերող բազային գիտելիքներ:

–   Մանրամասնեք խնդրեմ  «դիմածնոտային շրջանի եռաչափ ռադիոախտորոշում» ասվածը:

–   Եռաչափ հասկացողությունը նորություն չէ, նույն համակարգչային տոմոգրաֆիայի և ՄՌՏ  հետազոտական մեթոդների սկզբունքներով  է աշխատում, պարզապես օբյեկտը տեսնում ես 3 տարբեր հարթություններով: Եթե սովորական «նշանառու» մեթոդով ստացված պատկերները ստոմատոլոգիայում լինում են երկչափ և թույլ չեն տալիս լիարժեք ընկալել օբյեկտի իրական վիճակը, ապա եռաչափ ռադիոախտորոշման արդյունքում ստանում   ենք ճիշտ, չխաթարված պատկերներ և ուսումնասիրվող օբյեկտի մասին հնարավորինս ամբողջական տեղեկություններ:

–   Որո՞նք են կոնուս-ճառագայթային ռադիոախտորոշման առավելությունները որպես նորամուծություն:

–   Ի տարբերություն սպիրալային և շերտավոր համակարգչային տոմոգրաֆիայի, տվյալ հետազոտության առավելությունը պատկերն առավել դետալային ստանալու հնարավորությունն է: Մենք լավ գիտենք, որ ատամի համար մեկ միլիմետրն անգամ ունի կարևոր նշանակություն: Այս սարքի օգնությամբ կարելի է հետազոտել առանձին մասնիկներ, օրինակ, կարելի է հետազոտել 1 ատամը, ինչի հնարավորությունը մեզ չեն տալիս առկա համակարգչային տոմոգրաֆները: 

–   Դիմածնոտային շրջանի եռաչափ ռադիոախտորոշումն ի՞նչ կտա քիթ-կոկորդ-ականջաբանին (ՔԿԱ), հատկապես ի՞նչ խնդիրների ժամանակ են ակտուալ։

–   Ստոմատոլոգիան և քիթ-կոկորդ-ականջաբանությունը հարող մասնագիտոթություններ են: Դիմածնոտային շրջանի եռաչափ ռադիոախտորոշումը կիրառելի է քթի հարակից խոռոչների, միջին և ներքին ականջների տարբեր բորբոքումների, նորագոյացությունների հետազոտման և բուժման ժամանակ:   

ԵՊԲՀ օրթոպեդիկ ստոմատոլոգիայի ամբիոնի դոցենտ, բ.գ.թ. Հովհաննես Գասպարյան

Թեմայի շուրջ զրուցեցինք նաև սեմինարի մասնակից, ԵՊԲՀ օրթոպեդիկ ստոմատոլոգիայի ամբիոնի դոցենտ, բ.գ.թ. Հովհաննես Գասպարյանի հետ:

–   Եռաչափ պատկերների տեխնոլոգիան արդեն կիրառելի է ստոմատոլոգիայում, ի՞նչ հեռանկարներ եք տեսնում:

–   Առհասարակ պետք է նշել, որ 3D տեխնոլոգիաները վերջին տարիներին բավականին լուրջ զարգացում ունեցան և լայն կիրառություն ստացան նաև ստոմատոլոգիայում: Նախկինում ստոմատոլոգիան ընկալվում էր որպես արհեստ, ինչն արմատապես սխալ կարծիք է: Ստոմատոլոգիան լուրջ գիտություն է, դա միայն կարիես բուժելը կամ ատամ հեռացնելը չէ: Ստոմատոլոգիան զբաղվում է ամբողջ դիմածնոտային հատվածի առողջությամբ, ավելացնեմ. բերանի խոռոչն ամբողջ օրգանիզմի հայելին է: Եռաչափ տեխնոլոգիաների տարածումը Հայաստանում անշուշտ կնպաստի ստոմատոլոգիայի, որպես գիտության և պրակտիկ բժշկության ճյուղի զարգացմանը:

–   Դիմածնոտային շրջանի եռաչափ ռադիոախտորոշումն ի՞նչ հնարավորություններ է տալիս մասնագետին:

–   Դիմածնոտային շրջանի եռաչափ ախտորոշումն այսօր դարձել է ոչ միայն արդիական, այլև անհրաժեշտ, և ոչ միայն իմպլանտոլոգիայում, այլև ստոմատոլոգիայի բոլոր ճյուղերում: Դրանք հնարավորություն են տալիս ավելի ճշգրիտ ախտորոշում կատարել, ինչից էլ կախված է ճիշտ բուժումը:

–   Իսկ ի՞նչ եք ակնկալում սեմինարից:

–   Նոր գիտելիքներ: Սեմինարը հնարավորություն կտա մեր մասնագետներին ավելի վարժ ու գրագետ կիրառել եռաչափ ախտորոշման սարքավորումները: Չէ՞ որ բավական չէ ունենալ լավ սարքավորում, պետք է կարողանալ նաև դրանից ճիշտ օգտվել:

	"ԱՍՊԵՌԱ ՍԿԱՆ" բժշկական գիտական կենտրոնի տնօրեն, բժիշկ-ճառագայթաբան, բ.գ.դ. Արմեն Կարպի Ղազարյան

Սեմինարի մասնակիցներից է նաև մեր հաջորդ զրուցակիցը` "ԱՍՊԵՌԱ ՍԿԱՆ" բժշկական գիտական կենտրոնի տնօրեն, բժիշկ-ճառագայթաբան, բ.գ.դ. Արմեն Կարպի Ղազարյանը:

–   Ինչ նոր հնարավորություններ կտա եռաչափ ախտորոշումը ստոմատոլոգներին, ռադիոլոգներին:

–   Եռաչափ պատկերներն առհասարակ ակտուալ են բոլոր ոլորտներում: Եռաչափ պատկերները թույլ են տալիս տեսնել օբյեկտը ոչ միայն հարթության վրա, այլև տարածության մեջ: Եռաչափ պատկերներում  բոլոր անատոմիական կառուցավծքներն ավելի մոտ են բնականին: Եռաչափ ռադիոախտորոշման դեպքում պատկերներն ավելի տեղեկատվական են, դետալային: 

–   Ինչ առավելությո՞ւն ունի դիմածնոտային շրջանի եռաչափ ռադիոախտորոշումը:

–   Երկչափ պատկերների դեպքում անատոմիական որոշ դետալներ միաձուլվում են, իսկ երբ մենք ստանում ենք եռաչափ պատկերներ, առանձին անատոմիական մանրուքները կներկայանան այնպես, ինչպես կան: Վիրաբուժական ոլորտում այն նույնպես  կարևոր դերակատարում ունի. հնարավորություն է տալիս պլանավորել վիրահատությունը: Այսինքն` մանրամասն ցուցադրվող պատկերը հստակ ինֆորմացիա է տալիս այն մասին, թե որքան է խոռոչի խորությունը, որքան է մինչև նյարդն ընկած տարածությունը և այլն:

–   Ի՞նչ կարևորություն ունի այս նորամուծությունը քիթ-կոկորդ-ականջաբանի համար:

–   Եթե երկչափ պատկերի վրա կարող ենք առանձին մանր ոսկրիկները տեսնել, բայց չտեսնել նրանց միջև եղած կապը, անկյունները, ապա եռաչափի վրա կարող եք տեսնել նրանց կապը, համապատասխանությունը, անկյունները, դիրքերը: Ականջի խոռոչում հեղուկի կուտակման դեպքում կարելի է ճիշտ կողմնորոշվել, թե հատկապես որտեղ են կուտակումները:

–   Սեմինարն ի՞նչ կտա մասնագետին: Ի՞նչ սպասումներ ունեք:

–   Այն կծանոթացնի մեր բժիշկներին ժամանակակից ռադիոլոգիայի հնարավորությունների հետ, որպեսցի բժիշկները կարողանան ճիշտ կողմնորոշվել  իրենց աշխատանքային գործունեության մեջ: Շատ մասնագետներ փորձում են աշխատել ստանդարտ միջոցներով, չեն փորձում կատարելագործվել, զարգանալ, իսկ կան մասնագետներ, ովքեր իրենց պրակտիկայում լայնորեն օգտագործում են նորամուծությունները` չզիջելով արտասահամնյան մասնագետներին:

Հարցեր, պատասխաններ, մեկնաբանություններ