Արգանդի պարանոցի ախտաբանությանը վերաբերող ժամանակակից մոտեցումները քննարկվեցին հոկտեմբերի 23-ին կայացած գիտա-գործնական գիտաժողովում

Գիտաժողովի կազմակերպիչներն էին ՀՀ Առողջապահության նախարարությունը և Մոր և մանկան առողջության պահպանման գիտահետազոտական կենտրոնը: Գիտաժողովի գլխավոր հովանավորներն  ու աջակիցներն էին Գերմանական «Շտադա»  և  Ճապոնական «Աստելլաս» դեղագործական ընկերությունները: 

Կոնֆերանսի թեման արգանդի պարանոցի հիվանդություններին է վերաբերում, ինչի մասին զրուցեցինք Մոր և մանկան առողջության պահպանման գիտահետազոտական կենտրոնի  տնօրեն  բ.գ.դ. պրոֆեսոր Գեորգի Օկոևի հետ:

–   Պարոն Օկոև, ինչքանո՞վ է արդարացված այսօրվա թեմայի ընտրությունը:

–   Այսպիսի թեմաները շատ հրատապ են մեր երկրի համար: Ամբողջ աշխարհում տեղեկատվության մեծ հոսք կա, ցավոք, կան դժվարություններ ժամանակին համահունչ և մշտապես հասու լինել բոլոր նորություններին ու նորագույն մեթոդներին: Առհասարակ հեշտ չէ կապ պահպանել արտասահմանյան բժիշկների հետ, հեշտ չէ հոդվածներ, հանդեսներ ձեռք բերել:  Այդ պատճառով էլ  փորձում ենք կոմպենսացնել այդ բացը, կամզակերպել կոնֆերանսներ, որտեղ մեր բժիշկները հնարավորություն կունենան հանդիպելու առաջատար մասնագետների հետ: Այսօր հրավիրված էին առաջատար մասնագետներ Ռուսաստանի Դաշնությունից, ովքեր կներկայացնեն արգանդի վզիկի հիվանդությունները, դրանց ախտորոշումը, բուժման նոր մոտեցումները:

–   Արգանդի պարանոցի հիվանդությունների շարքում ի՞նչ տեղ է զբաղեցնում քաղցկեղը:

–   Արգանդի վզիկի քաղցկեղը համարվում է ամենաբուժվող քաղցկեղը միայն այն դեպքում, երբ ժամանակին է բուժումն իրականացվում: Հին Հռոմում ասում էին. ով լավ ախտորոշում է, լավ էլ բուժում է:

–   Եթե խոսենք հիվանդության ախտորոշման և բուժման հասանելիության մասին…

–   Այս կոնֆերանսը նվիրված է հենց հիվանդության ախտորոշման խնդիրներին, որոնք բավականին պարզ են, մատչելի, չեն պահանջում որևէ բարդ սարքավորում: Պահանջվող սարքավորումով զինված են Հայաստանի գրեթե բոլոր առողջապահական բուժհաստատությունները:

–   Արգանդի վզիկի քաղցկեղը թերևս միակ քաղցկեղն է, որի առաջացման պատճառները  բժիշկներին հայտնի են:

–   Այո՛, քաղցկեղ, որի առաջացման պատճառն այսօր պարզ է: Հիմնականում պապիլոմա վիրուսն է արգանդի վզիկում քաղցկեղի առաջացման պատճառ դառնում:  Ամբողջ աշխարհն արդեն հիվանդության դեմ պատվաստման հարցն է բարձրացնում, որպեսզի կանխարգելվի հիվանդների թվի աճը:

–   Արգանդի պարանոցի ո՞ր հիվանդություններն են տարածված մեր երկրում:

–   Հիմնականում տարածված են բորբոքային հիվանդությունները և քաղցկեղը: Ցավոք, քաղցկեղով հիվանդների թիվը առայժմ իջնելու հակում չունի:

–   Ի՞նչ խորհուրդ կտաք կանանց, չէ՞ որ այս կոնֆերանսի նպատակը հենց նրանց կյանքի որակի բարելավմանն է վերաբերում:

–   Մի վախեցեք դիմել բժշկի: Կանխարգելիչ հսկողությունը թույլ կտա խուսափել այս բոլոր խնդիրներից:

Մեզ հետ զրույցում արգանդի պարանոցի քաղցկեղի վերաբերյալ վիճակագրական տվյալներ ներկայացրեց Ֆանարջյանի անվան Ուռուցքաբանության ազգային կենտրոնի Օնկոգինեկոլոգիայի բաժանմունքի վարիչ, բ.գ.դ., պրոֆեսոր Գագիկ Բազիկյանը:

–   Պարոն Բազիկյան, պրոֆեսոր Օկոևը նշեց, որ արգանդի վզիկի քաղցկեղն այսօր շատ տարածված հիվանդություն է , և առայժմ նվազելու տենդենց չունի:  Իսկ վիճակագրական տվյալներն ինչպիսի՞ն են:

–   Իսկապես, հիվանդության դեպքերը չեն նվազում, հակառակը` տենդենց կա ավելի լայն տարածում գտնելու: Սա միայն մեր երկրին չի սպառնում, ամբողջ աշխարհում է այսպիսի իրավիճակ: Ի տարբերություն քաղցկեղի մյուս տեսակներին` արգանդի վզիկի քաղցկեղի տարածվածության ցուցանիշը գրեթե նույնն է. չի նվազում և չի էլ աճում: Այստեղ խնդիրը բարձիթողության մեջ է, հայտնաբերվում է ուշ, չնայած նախաքաղցկեղային շրջանը բավականին երկար է տևում` մոտ 8 տարի: Կարելի է կանխարգելել հիվանդությունը՝ նախքան քաղցկեղի ձևավորումը: Դրա համար պետք է  բարձրացնել առաջնային օղակի զգոնությունը, քանի որ առաջնահերթ նրանք են հանդիպում հիվանդին: Մեր հանրապետությունում արգանդի վզիկի քաղցկեղով տարեկան հիվանդանում է մոտ 300 կին, իսկ արգանդի մարմնի քաղցկեղի ցուցանիշը քիչ ավելին է:

–   Կա՞ն տվյալներ, թե որքանով է մեր հանրապետությունում արդյունավետ իրականացվում այս հիվանդության բուժումը:

–   Մեր չափորոշիչը բուժումից հետո 5 տարի ապրելիությունն է: Այսօրվա դրությամբ 5 տարվա կտրվածքով մենք ունենք 15.000 բուժված անձինք:  Սա բարձր ցուցանիշ է:

Մեր հաջորդ զրուցակիցն է գիտաժողովի բանախոս,  Արգանդի պարանոցի ախտաբանության և կոլպոսկոպիայի Ռուսաստանյան ասոցիացիայի քարտուղար, բ.գ.թ. Մարինա Կոստավան:

–   Այսօր առողջապահական ի՞նչ խնդիր է իրենից ներկայացնում արգանդի վզիկի քաղցկեղը:

–   Չնայած համաշխարհային բոլոր ձեռքբերումներին` այսօր հասարակության համար մեծ խնդիր է արգանդի պարանոցի քաղցկեղը: Առհասարակ այս հիվանդությունը տարբերվում է մյուս քաղցկեղներից, քանի որ առաջացման հիմնական պատճառները հայտնի են բժշկությանը. պապիլոմա վիրուսի առկայությունն ու նրա ակտիվ գործունեությունն է կնոջ օրգանիզմում: Գիտենք նաև, որ գոյություն ունի պատվաստանյութ, որը կարող է խոչընդոտել պապիլոմա վիրուսի ձեռքբերմանը: Այսինքն, սա այն եզակի դեպքերից է, երբ բժշկությունն ունի շատ վտանգավոր հիվանդության բուժման և նույնիսկ կանխարգելման հնարավորություն: Պարադոքսալ է, որ չնայած այս փաստերին, ամբողջ աշխարհում արգանդի վզիկի քացկեղից գրանցված մահերը չեն նվազում: Տարեկան 500.000 կին հիվանդանում է արգանդի վզիկի քաղցկեղով, որի արդյունքում մոտ 30%-ը  մահանում է: Ռուսաստանում, օրինակ, ամեն օր մոտ 18 կին մահանում է արգանդի վզիկի քաղցկեղից:

–   Ի՞նչ նորագույն մեթոդներ են կիրառվում հիվանդության ախտորոշման և բուժման բնագավառում:

–   Պապիլոմա վիրուսի բուժման գործընթացում մեծ հաջողություններ չեն գրանցվում, քանի որ չկան  անմիջական հակավիրուսային միջոցներ: Կանխարգելումը հնարավոր է, պարզապես պետք է նախքան սեռական կյանք մտնելը կինը պատվաստում ստանա: Շատ կարևոր է նաև քաղցկեղի վաղ շրջանում հայտնաբերումը, որպեսզի կանխվի չարորակ գործընթացների առաջացումը, և հնարավոր լինի խուսափել հիվանդության մահվան ելքից:

–   Ինչ է իրենից ներկայացնում կոլպոսկոպիայի մեթոդը:

–   Կոլպոսկոպը գործիք է, որը թույլ է տալիս վիզուալ գնահատել արգանդի վզիկի վիճակը: Օպտիկական համակարգի միջոցով այն թույլ է տալիս լավ հետազոտել արգանդի լորձաթաղանթը և ցույց տալ, թե ինչ բարդություններ կան:  Մեթոդը բավականին պարզ է, ոչ ինվազիվ և տեղեկատվական:

–   Եզրափակելով զրույցը` ի՞նչ կտա այս կոնֆերանսը բժշկին:

–   Մեր զեկույցներում նրանք լսեցին արգանդի պարանոցի հիվանդությունների ախտորոշման և բուժման նոր մեթոդների մասին, ծանոթացան ամբողջ աշխարհում հիվանդության դեմ իրականացվող ծրագրերին: Չկա այնպիսի բժիշկ, որ իր առօրյա գործունեության մեջ չառընչվի արգանդի պարանոցի հիվանդությունների հետ: Այս գիտաժողովը յուրովի օգնություն է թե՛ բժշկին, թե՛ կանանց:

Շտադա ընկերության բժշկական ներկայացուցիչ Անժելա Մելիքյանը մեզ հետ զրույցում ներկայացրեց միջոցառման կարևորության և առանձնահատկության մասին:

–   Անժելա, խնդրեմ, համառոտ ներկայացրեք բոլորիս արդեն լավ հայտնի «Շտադա» ընկերությունը և նրա կապը կոնֆերանսի հետ:

–   Մենք ներկայացնում ենք Հյաստանում «Շտադա» գերմանական դեղագործական ընկերությունը, որը շատ հայտնի է նաև ԱՊՀ տարածքում: Այսօրվա միջոցառման գլխավոր հովանավորն ենք, քանզի միշտ կարևորել ենք կնոջ առողջությունը, դրա պահպանմանն ու բուժմանն ուղղված բոլոր միջոցառումները: Այսօրվա միջոցառման կարևորության և հրատապության մասին խոսում է անգամ մասնակիցների թիվը, դահլիճում ընդհանրապես ազատ տեղ չկա, և մասնագետները նույնիսկ ոտքի վրա կանգնած են լսում:

–   Ինչո՞վ է առանձնանում այս կոնֆերանսը:

–   Կարինե Առուստամյանը ներկայացրել է  շատ հետաքրքիր գաղափար` նվիրված արգանդի վզիկի հիմնախնդրին:  Այսօր ներկայացնելու ենք բոլորովին նոր մոտեցում, որը պետք է շատ հետաքրքրեր բժիշկներին. Ելույթները լինելու են ոչ թե պարզապես զեկուցումների տեսքով, այլ ներկայացվելու է կոլպոսկոպիայի վարպետության դասեր Ռուսաստանի Դաշնության լավագույն կոլպոսկոպիստներից  մեկի` արգանդի պարանոցի ախտաբանության և կոլպոսկոպիայի Ռուսաստանյան ասոցիացիայի քարտուղար, բ.գ.թ. Մարինա Կոստավայի կողմից: Ուրախ ենք, որ մեր կազմակերպչական ներուժն օգնում է Հայաստանի բժիշկներին՝ կատարելագործվել իրենց աշխատանքային գործունեության մեջ:

ՇՏԱԴԱ դեղագործական ընկերության հայաստանյան ներկայացուցչության աշխատակիցները

Հարցեր, պատասխաններ, մեկնաբանություններ