Վիրուսային վարակներ, խնդրի արդյունավետ լուծում. Գեդեոն Ռիխտեր ընկերության կազմակերպած կոնֆերանսը

Մխ. Հերացու անվան Երևանի պետական բժշկական համալսարանի Մեծ կոնֆերենս-դահլիճում Գեդեոն Ռիխտեր դեղագործական ընկերության նախաձեռնությամբ տեղի ունեցավ «Վիրուսային վարակներ, խնդրի արդյունավետ լուծում» թեմայով կոնֆերանսը:

Կոնֆերանսի գլխավոր հյուրն ու բնախոսը Պ.Լ. Շուպիկի անվան Հետդիպլոմային կրթության Ազգային Բժշկական Ակադեմիայի կլինիկական իմունոլոգիայի և ալերգոլոգիայի ամբիոնի դոցենտ, «Ֆեոֆանիա» կլինիկական հիվանդանոցի (Կիև, Ուկրաինա) կլինիկական իմունոլոգիայի լաբորատորիայի ղեկավար Լ.Ս. Օսիպովան էր, ում հետ զրուցեցինք վիրուսային վարակների տարածվածության, ազդեցության, ախտորոշման և բուժման մասին:

–   Վիրուսային վարակները շատ արագ են տարածվում, իսկ որո՞նք են դրանց դեմ պայքարի ձևերը:

–   Մոտեցումները էականորեն փոխվել են, քանի որ հենց ալերգոլոգիայի ուսումնասիրությունը, զարգացումը նշանակալիորեն մեծացրել է վիրուսային վարակների ախտորոշման ճշգրտությունը: Եթե նախկինում մենք կարող էինք միայն պարզել` կա՞ արդյոք վիրուսային վարակ, թե ոչ, ապա այժմ կարող ենք որոշել, թե զարգացման ինչ մակարդակում է վիրուսը, սուր է, թե քրոնիկ,  հստակ պատասխանել՝ ինչ վիրուսի տեսակ է օրգանիզմում: Իմունոլոգիական ախտորոշումը  ևս մեծ դեր խաղաց վիրուսների ախտորոշման հարցում, քանի որ շատ հաճախ վիրուսները դիմակավորվում են  ամենատարբեր հիվանդությունների տեսքով: Եթե զուտ բուժման տեսանկյունից նայենք, ապա փոփոխությունը տարիների ընթացքում հսկայական է: Նախկինում անհնար էր ազդել վիրուսների վրա, քանի որ հակաբիոտիկները չունեն այդ ուժը, իսկ այժմ գոյություն ունեն հակավիրուսային իմուն համակարգը ակտիվացնող դեղամիջոցներ: Եթե ախտորոշումը և բուժումը կատարվեն ճիշտ ժամանակին, ապա մենք հեշտությամբ կհաղթահարենք վիրուսային վարակների վտանգը:

–   Ինչպե՞ս են ազդում վիրուսներն օրգանիզմի վրա:

–   Բոլոր վիրուսները նվազեցնում են օրգանիզմի իմունային համակարգի ակտիվությունը, և այս ֆոնին զարգանում են նաև բակտերիալ վարակները:  Այսպիսով` մենք ստանում ենք խրոնիկ հիվանդ, ով վիրուսային և բակտերիալ վարակների միքս է ստացել:  Այս դեպքում պետք է ընդունել արդեն թե՛ հակաբակտերիալ, թե՛ հակավիրուսային միջոցներ:

–   Ո՞ր վարակներն են առավել խնդրահարույց բժշկագիտության բնագավառում, եթե հարցը դիտարկենք սուր վարակային և քրոնիկ վարակային տեսանկյունից:

–   Եթե խնդրահարույց, ապա առաջին տեղում ՄԻԱՎ-ն է: Չափազանց տարածված են ռեսպիրատոր վիրուսային վարակները, որոնցով, որպես կանոն, հիվանդանում է գրեթե յուրաքանչյուրը՝ տարեկան 3-6 անգամ: Վիրուսների երկրորդ խումբը, որի մասին ևս այսօր խոսեցինք, հերպես վիրուսներն են, իդեպ, դրանք  միայն մեր պատկերացրած բշտիկները չեն, որոնք հայտնվում են շուրթերին: XX դարի վերջին խորությամբ ուսումնասիրվել է հերպես վիրուսը և այժմ գիտենք, թե ինչ հետևանքներ և ազդեցություններ կարող է թողնել այն: Ցավոք, բավականաչափ ուշադրության այս վիրուսները երբեմն չեն արժանանում, ինչը մտահոգիչ է:

–   Առանձին դիտարկենք պապիլոմա վիրուսի և հերպես վիրուսի հետ կապված խնդիրները:

–   Պապիլոմա վիրուսը մեկն է օնկոգեն վիրուսներից: Այն վտանգավոր է հատկապես կանանց համար, քանի որ կարող է արգանդի վզիկի քաղցկեղի առաջացման պատճառ դառնալ: Այսինքն` պապիլոմա վիրուսը խոչընդոտում է յուրաքանչյուր երկրի ազգաբնակչության ավելացմանն ու սերնդափոխությանը: Այդ պատճառով էլ այս խնդրի լուծման համար նորանոր մեթոդներ են մշակվում: Վերջերս բավականին մեծ տարածում են  գտել պապիլոմա վիրուսի դեմ պատվաստումները, որոնք սակայն, շատ սահմանափակումներ և կողմնակի ազդեցություններ ունեն: Այդքանով հանդերձ դրանք ամբողջովին չեն պաշտպանում պապիլոմա վիրուսից: Սա հարց է, որը ևս պետք է լուծվի իմունային համակարգի կարգավորման և վիրուսի վրա անմիջական ազդեցության միջոցով: Հերպես վիրուսի խմբից ամենաօնկոգեն վիրուսը համարվում է հենց էփշտեյն-Բարի վիրուսը: Այս վիրուսները խոչընդոտում են նաև հղիության նորմալ ընթացքը և կարող են մորից փոխանցվել պտղին: Հենց այս կոնֆերանսը ևս մեկ քայլ է բժիշկների, պացիենտների ուշադրությունը այս հարցին սևեռելու ուղղությամբ:

–   Վիրուսների դերը քաղցկեղային հիվանդությունների առաջացման հիմնախնդրում…

–   Վիրուսը ներբջջային մակաբույծ է, այն բազմանում է բջջի ներսում և դրա համար օգտագործում տիրոջ բջջի գենետիկ տեղեկատվությունը: Վիրուսը ձևափոխում է այն և արդյունքում ունենում ենք գենետիկ մուտացիա: Մի քանի մուտացիոն փոփոխություններն արդեն հանգեցնում են ուռուցքային գործընթացների զարգացմանը:  Շատ վիրուսներ պարզապես օգտագործում են գենետիկ տեղեկատվությունը, իսկ պապիլոմա վիրուսը վարակում է բջիջը և բազմացնում արդեն իրենով  վարակված բջիջներ: 

–   Ինչպե՞ս պայքարել և ինչպե՞ս կանխարգելել վիրուսների ներթափանցումն օրգանիզմ:

–   Պետք է բարձր պահել իմունային համակարգի դիմադրողականությունը:  Այն միակ վստահելի պաշտպանն է վիրուսներից: Քրոնիկ սթրեսը, սպիտակուցային քաղցը, անքնությունը, գերհոգնածությունը և կյանքի սովորական ռիթմի խախտումը խթանում են վիրուսների ներթափանցմանն ու բազմացմանը:

Մեր հաջորդ զրուցակիցը Գեդեոն Ռիխտեր դեղագործական ընկերության հայաստանյան ներկայացուցչության մենեջեր Լուսինե Բլուրցյանն է:

–   Ինչ ակնկալիքներ ունեք այսօրվա կոնֆերանսից, ի՞նչ արդյունքի եք սպասում:

 –   Այս կոնֆերանսին մենք հրավիրել ենք  Ուկրաինայի նախագահին կից բժշկական գծով հարցերի կառավարման գլխավոր իմունոլոգ Օսիպովային, ով մեր բժիշկներին պատմեց խնդրի հնարավոր լուծման ուկրաինական տարբերակի մասին: Քննարկվեցին բուժման և ախտորոշման հնարավոր բոլոր մեթոդները,  փորձեցինք լուծում տալ այս բնագավառում առկա մի քանի խնդրահարույց հարցերի: Սա պրակտիկ կոնֆերանս էր թերապևտների, մանկաբույժների և  գինեկոլոգների համար:

–   Գեդեոն Ռիխտերի դերը վիրուսային վարակների հիմնախնդրում և ի՞նչ է առաջարկում ընկերությունը խնդրի լուծման համար:

–   Գեդեոր Ռիխտերի ներկայացուցչությունն արդեն 3 տարի է, ինչ Հայաստանում գրանցել է «Գրոպրինոսին» դեղամիջոցը: Կան դեղամիջոցներ, որոնք ազդում են անմիջապես վիրուսի վրա և կան այնպիսիք, որոնք խթանում են իմունային համակարգի աշխատանքը: «Գրոպրինոսինը», որը պարունակում է ինոզին պրանոբեքս, ունի երկակի ազդեցություն: Այն և՛ խթանում է իմունային համակարգի աշխատանքը, և՛ ազդում անմիջապես վիրուսների վրա, արդյունքում կանխում վիրուսների բազմացումը և բարձրացնում օրգանիզմի դիմադրողականությունը:

Հարցեր, պատասխաններ, մեկնաբանություններ