Կոնֆերանս «Շնչուղիների ատոպիկ հիվանդություններով հիվանդների վարման նոր մոտեցումները» խորագրով

Գարունը բնության զարթոնքն է, նոր կյանքի սկիզբը, իսկ ոմանց համար՝ ալերգիաների:  «Գեդեոն Ռիխտեր» դեղագործական ընկերության հրավերով՝ շուրջ հարյուր բժիշկների համար ալերգիաների մասին դասախոսությամբ հանդես եկավ «Արաբկիր» բժշկական կենտրոնի Հանրապետական մանկական ալերգոլոգիական դիսպանսերի պատասխանատու, մանկաբույժ-ալերգոլոգ Աստղիկ Բաղդասարյանը:

Մանկաբույժ-ալերգոլոգ Աստղիկ Բաղդասարյանի հետ Մեդ Պրակտիկը  զրուցեց «Շնչուղիների ատոպիկ հիվանդություններով հիվանդների վարման նոր մոտեցումները» խորագրով անցկացվող դասախոսության, նրանում արծարծվող հիմնական թեմաների մասին:

–   Արդյո՞ք արդեն սկսված է սեզոնային ալերգիաների ռիսկային շրջանը:

–   Այո’: Այս տարի մի քիչ ավելի շուտ սկսվեց այդ սեզոնը, քանի որ եղանակը համեմատաբար շուտ տաքացավ: Սեզոնային ալերգիաները սովորաբար սկսում են գլուխ բարձրացնել ձնհալին զուգընթաց: Մեր երկրի համար այնքան էլ անհանգստացնող չեն ձմեռային ալերգենները: Եվրոպայում շատ տարածված է ծառերի նկատմամբ ալերգիան՝ կեչու, վայրի ընկուզենու… Այդ սեզոնը մի քիչ ավելի շուտ է սկսվում՝ հունվարի վերջին, ծառերի փոշոտմանը զուգահեռ: Մեզ մոտ ալերգիայի սեզոնի բացումը համընկնում է բորբոսասնկերի ակտիվացման հետ: Հիմնականում հողում և բույսերի վրա բնակվող այդ սնկերի սպորների քանակն անմիջապես աճում է մթնոլորտում, և նրանց նկատմամբ ալերգիա ունեցող մարդկանց գանգատները սկսվում են: Տարածված է նաև խոտերի, ծաղկափոշու նկատմամբ ալերգիան, որն ակտիվանում է հատկապես ապրիլի վերջին, մայիսին: Սեզոնը շարունակվում է գրեթե մինչև նոյեմբեր՝ մինչև նոր ձյունը:

–   Գործնականում արդեն զգո՞ւմ եք ակտիվացում, շատացե՞լ է սեզոնային ալերգիայի խնդրով Ձեզ դիմողների թիվը:

–   Վերջին մեկ ամսում դիմած հիվանդների մոտ հիմնականում հենց բորբոսասնկերից է ալերգիա ախտորոշվել: 

–   Սեռային, տարիքային ի՞նչ տարբերություններ կան, որոնք են թիրախային խմբերը:

–   Սեռային ապացուցված տարբերություններ չկան: Ինչ վերաբերում է տարիքին, հիմնականում դպրոցահասակ երեխաների մոտ է սկսվում. հազվադեպ է լինում, որ երկու տարեկանից փոքր երեխան ունենա սեզոնային ալերգիա:

–   Սեզոնային ալերգիաների աճի տենդենցներն ինչպիսի՞ն են վերջին շրջանում:

–   Վերջին տվյալներով՝ եվրոպական զարգացած երկրներում ալերգիայի տարածվածությունը շատ բարձր է: Որոշ երկրներում սեզոնային ալերգիա ունի բնակչության շուրջ 20 տոկոսը: Հայաստանում տվյալները մի փոքր այլ են: Ըստ դիմելիության՝ բնակչության մոտ 5-6 տոկոսն ունի սեզոնային ալերգիա, սակայն երբ առանձին խմբերում են հետազոտություններ իրականացվում՝ ոչ թե ամբողջ  բնակչության մակարդակով, ավելի բարձր ցուցանիշներ են ի հայտ գալիս՝ 10-12 տոկոս:

Տվյալները ցույց են տալիս, որ զարգացած երկրներում ալերգիկ հիվանդությունների աճը դանդաղել է, իսկ զարգացող երկրներում շարունակվում է աճել աննախադեպ տեմպերով: Եթե, օրինակ, Բրիտանիայում տասը տարի առաջ տարածվածությունը գնահատվում էր 20 տոկոս, ապա այսօր էլ գրեթե նույն ցուցանիշն է՝ բարձր, բայց կայուն:

–   Ինչպիսի՞ն է կանխարգելումը սեզոնային ալերգիաների դեպքում: Շատերն են այս շրջանում տագնապի մեջ, որ ահա կսկսվի անցանկալի վիճակը…

–   Եթե խոսքը երկրորդային կանխարգելման մասին է, այսինքն՝ այն մարդկանց մասին, ովքեր արդեն գիտեն, որ ունեն սեզոնային ալերգիա, ապա պետք է պարզապես ժամանակին դիմեն բժշկին, պարզեն իրենց ալերգենը և սեզոնի ընթացքում ստանան համապատասխան բուժում: Եթե բժիշկը կայացնի  որոշում, որ նրանք կարիք ունեն սպեցիֆիկ իմունոթերապիայի, այսինքն՝ վերջնական բուժման, ապա բուժման այդ տարբերակը կընդունեն նաև սեզոնից դուրս: Իսկ մարդիկ, ովքեր ալերգիա չունեն, այլ պարզապես վախենում են, մեծ տարիքում նախապես որևէ բուժման խնդիր չունեն, որովհետև չկան ապացուցված եղանակներ, որոնք կարող են կանխարգելել ալերգիայի առաջացումը:    

–   Արագ տեմպերով աճող և զարգացող հիվանդությունը բժիշկներից պահանջում է մշտապես թարմ, նորացվող գիտելիքներ: Դուք հաճա՞խ եք հանդես գալիս նման դասախոսություններով:

–   Դասախոսություններով հանդես գալու նման առաջարկներ հաճախ են լինում: Ես սկզբունքորեն դեմ եմ գովազդային դասախոսություններին, որոնք կարող են ունենալ բոլորովին հակառակ ազդեցություն: Իմ հիմնական նպատակը, եթե համաձայնում եմ դասախոսությամբ հանդես գալ, ժամանակակից գրականությանը համապատասխանող տվյալների տրամադրումն է, նոր գիտելիքներ փոխանցելը լսարանին:

Օրվա թեմայի մասին զրուցեցինք նաև «Գեդեոն Ռիխտեր» ընկերության մենեջեր Լուսինե Բլուրցյանի հետ:

–   Ալերգիան, լինելով արագ տեմպերով զարգացող հիվանդություն, մշտական զգոնություն, թարմ գիտելիքներ է պահանջում: Դրա՞ն է միտված այսօրվա հանդիպումը:

–   Մենք աշխատում ենք դեղամիջոցների մասին տեղեկատվություն հասցնել առաջին հերթին բժիշկներին, որովհետև հենց նրանց են դիմում այս խնդիրն ունեցող մարդիկ: Ուրախալի է այն փաստը, որ դեղամիջոցներից մեկը՝ «Լորդեստին»-ը, որն այսօր ներկայացվում է, կարելի է առանց դեղատոմսի ձեռք բերել: Շատ դեպքերում, երբ մարդը գիտի, որ ինքը տառապում է ալեգիայով, ինքնուրույն գնում է դեղատուն և դեղամիջոց փնտրում: Այսօր խոսելու  ենք նաև բրոնխիալ ասթմայի թեմայի շուրջ՝ փոքրերի և մեծերի մոտ: Այն մեծամասամբ ալերգիկ ֆոնով ընթացող հիվանդություն է և պահանջում է մի քանի դեղամիջոցներով համակցված բուժում, իսկ դրանցից մեկը՝ «Սինգլոն»-ը , «Գեդեոն Ռիխտեր» դեղագործական ընկերության դեղամիջոցներից է: 

–   Ինչպե՞ս եք գնահատում նման հանդիպումերի արդյունավետությունը:

–   Բժիշկները շատ հետաքրքրված են նման դասախոսություններով: Այսօր անդրադառնում ենք հիվանդության բոլոր կողմերին, բուժման ժամանակակից մոտեցումներին: Ներկայացվում են թարմ տվյալներ՝ ըստ վերջին ուղեցույցների: Թարմ գիտելիքներ, նոր դեղամիջոցներ, որոնք կարող են հաջողությամբ կիրառել մեր բժիշկները: 

Հարցեր, պատասխաններ, մեկնաբանություններ