ԵՊԲՀ. Ինտերնները փորձեցին իրենց ուժերը գիտագործնական համաժողովում

Ավանդույթի համաձայն՝ մեր համալսարանում անցկացվեց ինտերնների համար ամենամյա գիտագործնական համաժողով, որին մասնակցում էին թե՛ բուհի պրոֆեսորադասախոսական կազմի ներկայացուցիչները, թե՛ ուսանողները:

Հետբուհական և շարունակական կրթության ֆակուլտետի դեկանի տեղակալ Հասմիկ Կարապետյանի խոսքով՝ համաժողովի նպատակն է դեռևս ուսանելու տարիներից ինտերնների հետաքրքրությունն ուղղորդելու դեպի գիտագործնական գործունեություն:

Միջոցառումը կազմակերպված էր մրցույթի ձևով: Դասախոսներից բաղկացած հանձնաժողովը գնահատում էր զեկուցումներն ըստ սահմանված չափորոշիչների: Ինտերնները, ելնելով իրենց գործունեությունից և հակումներից, ղեկավարների խորհրդատվությամբ ընտրել էին նախասիրած թեմաներ, որոնք խոսում էին նրանց հետաքրքրությունների լայն շրջանակների մասին:

Առաջինը հանդես եկավ ռազմաբժշկական ֆակուլտետի ինտերն Ռոբերտ Ազարումյանը՝ ղեկավար, ռազմադաշտային թերապիայի ամբիոնի պետ, դոցենտ, բ.ծ. փոխգնգապետ Վարդան Ծատուրյանի աջակցությամբ պատրաստած վահանաձև գեղձի ծավալային գոյացությունների վերաբերյալ արդիական մոտեցումներով հագեցած զեկույցով:

«Հերացի» թիվ 1 հիվանդանոցային համալիրի ինտերն Լուսին Կարահակոբյանի «Ասցիտ» թեմայով բովանդակալից զեկուցման հարցում մասնագիտական խորհուրդներ էր տվել ղեկավարը՝ համալիրի փորձաքննությունների պատասխանատու Տաթևիկ Հովհաննիսյանը:

Նույն համալիրի ինտերն Վահե Շահմորադին և նրա ղեկավար, սրտաբանության ամբիոնի դոցենտ, բ.գ.թ. Լաուրա Սահակյանը նախապատրաստել էին կլինիկական դեպք, որը քննարկվեց ունկնդիրների մասնակցությամբ: Հիվանդի կլինիկական եզրափակիչ ախտորոշումը դրվեց համատեղ ուժերով, ինտերակտիվ վերլուծության շնորհիվ:

Հաշվի առնելով լսարանի մասնագիտական բազմազանությունը և հետաքրքրությունները՝ «Հերացի» հիվանդանոցային համալիրի թիվ 1 ստոմատոլոգիական պոլիկլինիկայի ինտերն Ջուլիետ Սարդարյանն անդրադարձավ բերանի խոռոչի լորձաթաղանթի վրա վարակիչ և ոչ վարակիչ հիվանդությունների ախտանշանների դրսևորումներին: Նա զեկուցումը կազմել էր ընդհանուր ստոմատոլոգիական գործունեության կուրսի պրոֆեսոր, Վալերի Տատինցյանի խորհրդատվությամբ:

Ներկաները առավել հետաքրքրությամբ ընդունեցին ռազմաբժշկական ֆակուլտետի երկու ինտերնների զեկուցումները. նրանցից՝ Արամայիս Հայրապետյանը պատրաստել էր «Պահակային ավշային հանգույց» թեման օնկոլոգիայի ամբիոնի դոցենտ, Արտեմ Ստեփանյանի ղեկավարությամբ:

Իսկ Էդգար Մկրտչյանը «Ֆունկցիոնալ մագնիս-ռեզոնանսային տոմոգրաֆիայի օգտագործումը հոտառական անալիզատորի ակտիվ զոնաների հայտնաբերման համար ի պատասխան օդորանտներով գրգռմանը» թեմայով զեկուցումը պատրաստել էր նյարդաբանության ամբիոնի դոցենտ, բ.գ.թ. Իռենա Հովհաննիսյանի օգնությամբ:

Պետք է նշել, որ ինտերնները համաժողովին նախապատրաստվել էին բարձր պատասխանատվությամբ, զեկուցումները կազմելիս ուսումնասիրել էին համապատասխան գրականություն, կիրառել բազմաթիվ ուսանելի սլայդներ, որոշ դեպքերում՝ նաև տեսանյութեր: Նրանց ելույթները գրագետ էին, մատուցվող նյութը՝ լիովին յուրացված: Զեկուցումների ընթացքում ծագած հարցերն ստացան սպառիչ պատասխաններ ու պարզաբանումներ ինտերնների և նրանց ղեկավարների կողմից:

Միջոցառումն աշխատանքն ամփոփեց հետբուհական և շարունակական կրթության ֆակուլտետի դեկան Սաթենիկ Բաղդասարյանը:

Դասախոսական հանձնաժողովի անդամների լրացրած անանուն հարցաթերթիկների արդյունքներն ամփոփելու արդյունքում բոլոր զեկուցումներն էլ արժանացան բարձր գնահատականի, իսկ առաջատարները Ա. Հայրապետյանը և Է. Մկրտչյանն էին:

Հարցեր, պատասխաններ, մեկնաբանություններ