ԵՊԲՀ. Մեկնարկեցին Գերմանիայի և Ավստրիայի համալսարանների պրոֆեսորների դասախոսությունները

Երևանի Մխիթար Հերացու անվան պետական բժշկական համալսարանում ապրիլի 9-ից 12-ը կանցկացվեն երկու գիտագործնական համաժողովներ՝ «Քաղցկեղի ախտորոշման և բուժման ներկայիս չափանիշներ» և «Առողջապահական կիրառական հետազոտություններ և քաղցկեղի ռեգիստրներ» խորագրով, որի ընթացքում դասախոսություններով հանդես կգան Գերմանիայի և Ավստրիայի 11 պրոֆեսորներ:

ԵՊԲՀ գիտության գծով պրոռեկտոր Կոնստանտին Ենկոյանը նշեց, որ այս կոնֆերանսները արդեն տարիների պատմություն ունեցող համագործակցության շարունակությունն են: Բժշկագիտության արդի թեմաների շուրջ անցացվող համաժողովները կազմակերպված են Գերմանիայի Մյունսթերի համալսարանական կլինիկայի և ԵՊԲՀ միջև կնքված համագործակցության համաձայնագրի շրջանականերում: Մյունսթերի համալսարանական կլինիկան Գերմանիայի առաջատար կլինիկաներից մեկն է, ունի շուրջ 7200 աշխատակից և հանդիսանում է երկրի մեծ թվով աշխատատեղ ունեցող կառույցներից մեկը: Բժշկական համալսարանի և Մյունսթերի միջև համագործակցության շրջանակներում 2016 և 2017թթ. ընթացքում մասնագիտական կատարելագործման նպատակով Մյունսթերի կլինիկա են մեկնել 6 բժիշկ: Նախատեսվում է այդ կլինիկայում յուրաքանչյուր տարի ԵՊԲՀ համալսարանական կլինիկայի 3 բժշկի մասնագիտական կատարելագործում: ԵՊԲՀ ռեկտոր Արմեն Մուրադյանը՝ ողջունելով Գերմանիայից և Ավստրիայից ժամանած պատվիրակության անդամներին, կարևորեց այն թեմաները, որոնց կանդրադառնան արտերկրից ժամանած մասնագետները հայ գործընկերների հետ: Նա նշեց, որ խիստ արդիական են քաղցկեղի բուժման և ախտորոշման, ինչպես նաև հանրային առողջապահական խնդիրները:

«Առողջապահական դաշտում ժամանակակից վիճակագրությունը թույլ է տալիս կիառել այն գործիքները, որոնք կարող են արդյունավետ լինել հիվանդությունների կանխարգելման և բուժման գործընթացում», - նշեց ԵՊԲՀ ռեկտորը: Նրա գնահատմամբ՝ եռօրյա մասնագիտական քննարկումները կնպաստեն, որպեսզի մասնակիցները ներկայացնեն իրենց երկրի հաջողությունները և խոսեն ծառացած խնդիրների մասին: Ռեկտորի խոսքով՝ քաղցկեղի դեմ պայքարի թեմայի քննարկման արդիականությունը կասկած չի հարուցում, քանի որ քաղցկեղը մահացությունների երկրորդ պատճառն է՝ սիրտ-անոթային հիվանդություններից հետո: Ելույթ ունեցավ և մասնակիցներին արդյունավետ աշխատանք մաղթեց Հայաստանում Գերմանիայի արտակարգ և լիազոր դեսպան Բերնհարդ Մաթիաս Քիսլերը: Նա ողջունեց բոլոր հեղինակավոր այն կառույցների ներկայացուցիչներին, ովքեր ժամանել են Երևան այս միջոցառմանը մասնակցելու համար: Դեսպանը առանձնակի ընդգծեց այն փաստը, որ առողջապահական և կրթական ոլորտները շատ կարևոր դեր ունեն յուրաքանչյուր երկրի զարգացման գործում: Դիվանագետը վերջին անգամ երեք տարի առաջ էր այցելել ԵՊԲՀ և տպավորված էր համալսարանի կողմից կատարվող աշխատանքներով: Նրա կարծիքով՝ չնայած հաջողություններին, անելիքները նույնպես շատ են: ՀՀ ԱՆ գլխավոր ուռուցքաբան, Ուռուցքաբանության ազգային կենտրոնի տնօրեն Արմեն Տանանյանը նույնպես համաձայնեց այն կարծիքի հետ, որ ուռուցքաբանության ոլորտում մեր երկրում դեռ կան բազմաթիվ խնդիրներ, քանի որ ամեն տարի գրանցվում է հիվանդացության աճ, շարունակում է օրակարգային մնալ մահացությունը: Նրա տեղեկացմամբ՝ այսօր Հայաստանում 40 հազարի է հասնում քաղցկեղը հաղթահարած մարդկանց թիվը: Մասնագետը շեշտեց Հայաստանի և Գերմանիայի համագործակցության ընդլայնման անհրաժեշտությունը հատկապես ուռուցքաբանության ոլորտում: Համբուրգի Նորդակադեմիայի պրոֆեսոր Յորգ Հայերը նշեց, որ իրենք պատրաստ են աջակցել մեր երկրին հիվանդների ազգային ռեգիստրի ստեղծման, հետազոտական աշխատանքների իրականացման, երիտասարդ բժիշկներին կրթելու հարցերում: Նշենք, որ Համբուրգի Նորդակադեմիան հանրային առողջության ոլորտում նախատեսում է ԵՊԲՀ հետ իրականացնելու երկամյա դրամաշնորհային ծրագիր, մասնավորապես՝ նախատեսվում է ներդնել մագիստրոսական համատեղ ուսումնական ծրագիր: «Մենք ցանկանում ենք օգնել ձեր երկրին զարգացնելու քաղցկեղի հետ կապված ենթկառուցվածքները, ինչպես նաև սատարել ազգային ծրագիր մշակելուն, ռադիոուռուցքաբանության զարգացմանը»,- ասաց պրոֆեսորը:

Այս առումով հետագա ծրագրերի մեկնակետը նա համարեց հենց այս համաժողովը: Գերհարդ Դոմագկի անվան ախտաբանության ինստիտուտի նախագահ, պրոֆեսոր Էվա Վարդելմանը նշեց, որ քաղցկեղի ախտորոշման և բուժման ոլորտում անցում է կատարվում դեպի անհատականացված բժշկություն: «Ուռուցքաբանական հիվանդությունների բուժումը շատ ակտիվ թերապիա է պահանջում: Մենք ձգտում ենք, որպեսզի պացիենտների դասակարգում կատարվի: Պացիենտները ստանան համապատասխան թերապիա, բարձրացվի թերապիայի ադեցությունը՝ նվազեցնելով կողմնակի ազդեցությունները»,- մանրամասնեց մասնագետը՝ ընդգծելով, որ եթե չկա ախտորոշում, ուրեմն չի կարող լինել նաև լավ բուժում: Նա նկատեց, որ Հայաստանում քիչ է ախտաբանների թիվը, և այս ուղղությամբ ևս պետք է աշխատանքներ իրականացվեն: Ծրագրված է համատեղ աշխատանք նաև փոխանակային ծրագրերի, տեխնոլոգիական և մեթոդոլոգիական աջակցության, արդիական գիտելիքների հասանելիության ուղղությամբ: ԵՊԲՀ հյուրերի թվում են պրոֆ. Էվա Վարդելմանը՝ Գերհարդ Դոմագկի անվան ախտաբանության ինստիտուտի նախագահը, պրոֆ. Յորգ Հայերը՝ կիրառական գիտությունների Նորդակադեմիայի առողջապահության մենեջմենթի գծով ղեկավարը, պրոֆ. Հերիբերթ Յուրգենսը՝ Մյունսթերի համալսարանի վաստակավոր պրոֆեսորը, պրոֆ. Անդրեաս Գրոլը՝ Մյունսթերի մանկական հիվանդանոցի ոսկրածուծի փոխպատվաստման կենտրոնի ղեկավարը, պրոֆ. Դիտրիխ ֆոն Շվայնիցը՝ Մյունխենի ֆոն Հաուների անվան մանկական հիվանդանոցի վիրաբուժության բաժանմունքի ղեկավարը, պրոֆ. Կոռնելիա Լիդթքեն՝ Բեռլինի Շարիտե համալսարանի գինեկոլոգիայի և կրծքագեղձի հետազոտական կենտրոնի դասախոսը և ավագ բժիշկ, պրոֆ. Էռնստ Ռումմենին՝ Մյունխենի տեխնիկական համալսարանի բժշկության դպրոցի ճառագայթաբանության ինստիտուտի տնօրենը, դոկտոր Մայքլ Քվանտեն՝ Մյունխենի տեխնիկական համալսարանի Ռոման Հերցոգի անվան քաղցկեղի կենտրոնի կլինիկայի ղեկավարը, մագիստրոս Յուրգեն Շեֆերսը՝ Գերմանիայի միջազգային խորհրդատվական և մենեջմենթի կառուցման կազմակերպության կառավարական կապերի բաժնի ղեկավարը, դոկտոր Կատրին Շլաքը՝ Մյունսթերի համալսարանական հիվանդանոցի ուրոլոգ խորհրդատուն, ուրոլոգների գերմանական խորհրդի անդամ, դոկտոր Հարալդ Հերմանը՝ Վիեննայի բժշկական համալսարանի ճառագայթային ուռուցքաբանության բժիշկը:

Հարցեր, պատասխաններ, մեկնաբանություններ