Առողջապահության ոլորտում 2011-ի անելիքները` նախարարի ներկայացմամբ

ՀՀ առողջապահության նախարար Հարություն Քուշկյանը երեկ ներկայացրել է  ոլորտի 2011 թվականի գործունեության միջոցառումների ծրագիրը, գերակա խնդիրները:

Նախարարը նշել է, որ այս տարի միանգամից մեկարկել է մի քանի ծրագիր` երեխայի առողջության պետական հավաստագրի ներդրում, համավճար, շտապօգնության արդիականացման, ինչպես նաև առաջնային օղակում ֆինանսավորման նոր մեխանիզմների կիրառում:

Հարություն Քուշկյանը հավելել է նաև, որ շարունակվելու է Համաշխարհային բանկի հետ համագործակցությունը: Մասնավորապես շեշտել է, որ այս տարի շահագործման են հանձնվելու Ապարանի և Գավառի բժշկական կենտրոնները: Համաշխարհային բանկի կառավարման խորհրդի կողմից հաստատված ավելի քան 25 միլիոն դոլար հավելյալ ֆինանսավորման ծրագրով 2011-ի ընթացում կմեկնարկեն Մեղրիի, Կապանի, Բերդի, Վանաձորի և Աբովյանի բժշկական կենտրոնների, ինչպես նաև 13 ամբուլատորիայի շինարարական աշխատանքները:

ՀՀ առողջապահության նախարարության 2011 թվականի գործունեության գերակա ուղղություններ

• Համավճարի համակարգի ներդրում անհետաձգելի և գինեկոլոգիական բժշկական օգնության և սպասարկման բնագավառներում
• Առողջության առաջնային պահպանման օղակում ըստ կատարողականի (խրախուսական) ֆինանսանվորման կարգի հաստատում և ներդրում
• Երեխայի առողջության պետական հավաստագրի համակարգի ներդրման ծրագրի մշակում և իրականացում
• Շտապ բժշկական օգնության և սպասարկման հայեցակարգի ներդրում, շտապօգնության ծառայությունների որակի և մատչելիության բարելավում

Համավճար

2011թ. փետրվարի մեկից հանրապետության ողջ տարածքում պետության կողմից իրականացվող ֆինանսավորման հետ մեկտեղ ներդրվել են համավճարային մեխանիզմներ անհետաձգելի և գինեկոլոգիական բժշկական օգնության և սպասարկման ծրագրերում, ինչը նախատեսում է ծառայության փոխհատուցման հարցում բնակչության մասնակցություն:

Համավճարի չափը սահմանվել է բժշկական ծառայությունների իրական ինքնարժեքի և պետության կողմից սահմանված գնի տարբերությամբ: Համավճարի չափը դիֆերենցված է` ըստ մարզերի և Երևանի: ՀՀ մարզերում բնակչության մասնակցությունը համավճարի ձևով համամասնորեն սահմանվել է ավելի ցածր, քան մայրաքաղաքում:

Համավճարի ներդրման արդյունքում գոյացած ֆինանսական միջոցները կնպաստեն  բուժօգնության ծառայությունների որակի, բժշկական հաստատությունում ֆինանսական հոսքերի կառավարման բարելավմանը, բնակչության համար ֆինանսական ծախսերի կանխատեսելիության ավելացմանը: Նշված միջոցները ուղղվելու են նաև բուժանձնակազմի աշխատավարձերի բարձրացմանը, որի նպատակով նաև սահմանվելու է բուժանձնակազմի վարձատրման հստակ կարգ:

ֆինանսանվորման կարգ` ըստ կատարողականի

Ըստ կատարողականի (խրախուսական) ֆինանսավորման և վարձատրության համակարգի ներդրումը նպատակ ունի վերացնել համահարթեցումը բժշկական հաստատությունների և բժիշկների միջև, բժշկական հաստատություններին հատկացնել խրախուսական ֆինանսավորում, իսկ բժիշկներին համապատասխան խրախուսական վարձատրություն` ՀՀ առողջապահության նախարարության կողմից հաստատված գործունեության  ցուցանիշների գնահատականից ելնելով:

Ներկայումս ԱԱՊ ծառայություններ մատուցողների ֆինանսավորումն իրա¬կա¬նացվում է ըստ մարդաշնչի ֆինանսավորման սկզբունքով: ԱԱՊ մատուցող բժշկական հաստատությունների պայմանագրային գումարները հաշվարկվում ու ֆինան¬սա¬վորումն իրականացվում է կցագրված ազգաբնակչության թվաքանակից ելնելով: ԱԱՊ ծառայություններ իրականացնող բժիշկներն էլ վարձատրվում են համապատաս¬խանաբար` իրենց կցագրված ազգաբնակչության թվից ելնելով: Այսինքն, ուղղակիորեն հաշվի չեն առնվում բժշկական հաստատությունների և բժիշկների կողմից մատուցվող ծառայությունների քանակական և որակական ցուցանիշները:

Ըստ կատարողականի (խրախուսական) ֆինանսավորման և վարձատրության կարգի`  ֆինանսապես կխրախուսվեն այն բժշկական հաստատություններն ու բժիշկները, որոնց գործունեության արդյունքները գնահատվել են հաստատված չափաբաժիններով, ինչը զգալիորեն կբարձրացնի  բժշկական հաստատությունների կողմից մատուցվող ծառայությունների որակը, հնարավորություն կտա գնահատել ԱԱՊ ծառայություններ մատուցող բժիշկների աշխատանքը` ելնելով որոշակի առողջապահական ցուցանիշներից:

Երեխայի առողջության պետական հավաստագիր

Ծննդօգնության պետական հավաստագրի ներդրման ծրագրի շարունակականությունն ապահովելու նպատակով  Մոր և մանկան առողջության պահպանման 2011թ. պետական նպատակային ծրագրի շրջանակներում 2011թ. հունվարի 1-ից ներդրվել է  0-7 տարեկան երեխաների հավաստագրի համակարգ:

Երեխայի առողջության պետական հավաստագրի ներդրմամբ կապահովվի երեխաների հիվանդանոցային ծառայությունների իրական մատչելիություն և որակ, կբարելավվեն բժիշկ-պացիենտ հարաբերությունները` բարձրացնելով բուժաշ¬խա¬տողների աշխատավարձերը և նպաստելով բուժաշխատողների որակյալ աշխատանքի մոտիվացիայի ձևավորմանը, կիրականացվի պետության կողմից անվճար բուժ¬օգնության համար երեխաներին տրված երաշխիքները և սոցիալական արդարության սկզբունքները, կնվազի երեխաների հիվանդանոցային մահաբերությունը և կկրճատվի հանրապետությունում մանկական մահացության ցուցանիշը:

Շտապ բժշկական օգնություն

Ներկայումս Շտապօգնության ծառայության ավտոպարկը հին է, անբավարար հագեցվածությամբ և միայն վերջին երկու տարում է, որ հանրապետության մարզերի  որոշ բուժհաստատություններին տրամադրվել են շտապօգնության նոր մեքենաներ:

Շտապօգնության ծառայության ավտոպարկի նորացումը. ժամանակակից սարքավորումներով  և պարագաներով հագեցումն իրականացվելու է Չինաստանի Ժողովրդական Հանրապետության ապրանքային դրամաշնորհի շրջանակներում:

Ներդրվելու է Շտապօգնության և սպասարկման կանչերի ընդունման միասնական համակարգ, ստեղծվելու է միասնական դիսպետչերական կենտրոն: Կանչերի ընդունումն իրականացվելու է GPRS արբանյակային կապի միջոցով, որը հնարավո¬րություն կընձեռի արագ արձագանքելու, ինչպես նաև առավելագույնը վերահսկելի դարձնել կանչերի իրականացման ընթացքում մեքենաների տեղաշարժը, գտնվելու կոնկրետ վայրը, կանչի տևողությունը, կատարված ծախսերը (վառելանյութ, դեղեր ևն):

Ծառայության վերակենդանացման բրիգադների համալրման նպատակով իրականացում է առաջատար կլինիկաների բժիշկ–ռեանիմատոլոգների և կլինիկական օրդինատորների ներգրավում շտապօգնության բրիգադներում: Համաձայն ժամանակացույցի և կրթական ծրագրերի` իրականացվում է մասնագետների վերապատրաստում (բժիշկներ, բուժքույրեր, վարորդ – սանիտարներ):

Վերանայվել են ծառայության ֆինանսավորման և մասնագետների վարձատրության սկզբունքները, զգալիորեն բարձրանալու է մասնագետների վարձատրության չափը:

Ծրագրի իրականացման արդյունքում ակնակալվում է շտապ և անհետաձգելի բժշկական օգնության ծառայությունների որակի և մատչելիության էական բարելավում:

Հարցեր, պատասխաններ, մեկնաբանություններ