Քաղցկեղի վաղաժամ ախտորոշումը չափազանց կարևոր է հաջող բուժման համար. հայ փորձագետ

Հայաստանում ուռուցքային  հիվանդությունների բուժման հարցում հիմնական շեշտը դրվում է վաղաժամ ախտորոշման վրա, հինգշաբթի «Նովոստի» միջազգային մամուլի կենտրոնում ասաց Հայաստանի ուռուցքաբանության ազգային կենտրոնի փոխտնօրեն, բժշկական գիտությունների դոկտոր, պրոֆեսոր Գագիկ Բազիկյանը:

«Որոշակի արդյունքների հասնելու համար շատ կարևոր է վաղաժամ հայտնաբերումը: Հիվանդների շուրջ 40-45 տոկոսը դիմում են մեզ քաղցկեղի խորացած փուլում», ասաց նա փետրվարի 4-ին նշվող քաղցկեղի դեմ պայքարի միջազգային օրվա նախօրեին կազմակերպված Երևան-Մոսկվա-Կիև-Թբիլիսի տեսակամուրջի ընթացքում:

Այս կապակցությամբ Բազիկյանը նշեց, որ Հայաստանում կան ուռուցքային  հիվանդությունների բուժման բոլոր հնարավորությունները, որոնց թվում են՝ վիրաբուժությունը, ճառագայթայի թերապիան և քիմիաթերապիան:

«Բացի այդ Առողջապահության նախարարության հետ համատեղ մենք հիվանդության վաղաժամ հայտնաբերման վերաբերյալ 2011-2018 թթ.-ի ռազմավարություն ենք մշակել», - ասաց նա:

Բժիշկը պարզաբանեց, որ հիվանդներին հայտնաբերում են ոչ թե ուռուցքաբանները, այլ առողջապահության համակարգի առաջնային օղակը, այդ օղակի բժիշկը որոշում է, թե ինչ հետազոտություններ են հարկավոր՝ հաշվի առնելով հիվանդի տարիքն ու սեռը:

«Կարծում եմ, որ եթե այս ծրագիրն իրականացվի, ապա հիվանդության՝ անուշադրության մատնված և խորացած դեպքերի տոկոսը կնվազի, և մենք կհասնենք այն հաջողություններին, որոնց հասել են մեր գործընկերներն արտերկրում», - ասաց Բազիկյանն՝ ավելացնելով, որ արտերկրում հիվանդության խորացած դեպքերը շատ ավելի քիչ են, քան Հայաստանում:

Նա տեղեկացրեց նաև, որ Հայաստանում ուռուցքաբանության ոլորտի ֆինանսավորումը հիմնականում իրականացվում է պետական մակարդակով, «սակայն միջոցները չեն բավարարում հիվանդների բուժման համար»: «Նույն խնդիրն ունենք նաև թանկարժեք քիմիական դեղամիջոցների հարցում, հիվանդները հաճախ ստիպված են իրենք վճարել», - ասաց նա:

Այս կապակցությամբ նա պարզաբանեց, որ ռազմավարության իրագործման առաջին փուլում որոշում է ընդունվել ուռուցքային հիվանդությունների վաղաժամ հայտնաբերման գործընթացը սկսել կանանց վերարտադրողական համակարգի, աղեստամոքսային տրակտի և թոքերի գծով:

Հայաստանում 100 հազար մարդու հաշվով քաղցկեղի հիվանդացության ցուցանիշը կազմում է 270, իսկ մահացությանը՝ 170: Հանրապետությունում ուռուցքային  հիվանդությունների պատճառով մահացության ցուցանիշի տարեկան աճը կազմում է 2-3 տոկոս:

Վերջին տվյալների համաձայն՝ 2009 թ.-ին հիվանդների թիվը, որոնց մոտ ուռուցքային հիվանդություն է հայտնեբերվել, կազմում է ավելի քան 7656 մարդ, մասնավորապես՝ 1200-ի մոտ հայտնաբերվել է թոքերի քաղցկեղ, 1100-ի մոտ՝ կրծքագեղձի քաղցկեղ, 579-ի մոտ՝ ստամոքսի քաղցկեղ, 423-ի մոտ՝ հաստ աղիի քաղցկեղ, 402-ի մոտ՝ միզապարկի քաղցկեղ: 2009 թ.-ին Հայաստանում քաղցկեղից մահացության դեպքերի թիվը գերազանցել է 5 հազարը:

2010 թ.-ի ցուցանիշները կամփոփվեն այս տարվա փետրվարին:

Հայաստանի ազգային ուռուցքաբանական կենտրոնի դիսպանսերում բուժում է ստանում շուրտ 31 հազար հիվանդ, որոնցից ավելի քան 15 հազարը բուժվել են և կարող են ապրել հինգ և ավելի տարի:

2010 թ.-ին Հայաստանի պետբյուջեից ուռուցքաբանական ոլորտին հատկացվել է 800 միլիոն դրամ (շուրջ 2,2 միլիոն դոլար):

Հարցեր, պատասխաններ, մեկնաբանություններ