Կոնֆերանս՝ նվիրված Դիաբետի դեմ պայքարի համաշխարհային օրվան

1891 թ. նոյեմբերի 14-ին է ծնվել հայտնի գիտնական, բժշկության բնագավառում Նոբելյան մրցանակի արժանացած Ֆրեդերիկ Բանտինգը, ով 1923 թ. հայտնաբերել է ինսուլինը:  Այդ կապակցությամբ էլ ամբողջ աշխարհում նոյեմբերի 14-ն ընդունված է նշել որպես շաքարախտի դեմ պայքարի համաշխարհային օր: Սկսած 1999 թվականից  Հայաստանում նույնպես նշվում է Դիաբետի համաշխարհային օրը: Ամբողջ աշխարհում շաքարային դիաբետը կարևորագույն բժշկասոցիալական խնդիրներից մեկն է, որը կարճ ժամանակում հանգեցնում է հաշմանդամության և կյանքի տևողության կրճատման: Շաքարային դիաբետը քրոնիկ հիվանդություն է, որն ի հայտ է գալիս ենթաստամոքսային գեղձի ոչ բավարար քանակությամբ ինսուլին արտադրելու դեպքում, կամ` երբ օրգանիզմը չի կարողանում յուրացնել ինսուլինը, որն էլ առաջացնում է արյան մեջ գլյուկոզայի մակարդակի բարձրացում:

Շաքարախտի դեմ պայքարի համաշխարհային օրվա առիթով  Շաքարախտի հայկական ասոցիացիան`  ՀՀ առողջապահության նախարարության աջակցությամբ, «Մոսկվայի տուն» մշակութագործարարական կենտրոնում կազմակերպել էր կոնֆերանս:

Կոնֆերանսի աշխատանքների, հիվանդության հետ կապված խնդիրների մասին զրուցեցինք Ներզատաբանների հայկական ասոցիացիայի նախագահ Էլզա Հայրապետյանի հետ:

–   Տիկին Հայրապետյան, տարեցտարի աճում է շաքարախտով հիվանդ մարդկանց թիվը, ինչո՞վ է դա պայմանավորված:

–   Այո, ամբողջ աշխարհում տարեցտարի անհավանական մեծ քայլերով աճում է շաքարախտով հիվանդ մարդկանց թիվը: Անցյալ տարվա տվյալներով՝ ամբողջ աշխարհում հաշվառվում է դիաբետով հիվանդ մոտ 366 միլիոն մարդ:  2030 թ. շաքարախտով հիվանդների թիվը կհասնի 552 միլիոնի, այսինքն` ամբողջ երկրագնդի բնակչության 9.9%-ը, որը շատ լուրջ ցուցանիշ է:

–   Այս առումով կարո՞ղ եք ներկայացնել իրավիճակը Հայաստանում, ի՞նչ միտում է նկատվում:

–   Հայաստանում այսօր գրանցված է դիաբետով հիվանդ մոտ 56 հազար մարդ, սակայն  դա միայն հաշվառվածներն են, շատերն ունեն շաքարախտ, որոնք հաշվառված չեն, կամ` նույնիսկ չգիտեն, որ հիվանդ են: Շաքարախտն այսօր համարվում է անբուժելի հիվանդություն, ուրեմն մենք պետք է փորձենք կանխել դրա առաջացումը:

–   Որո՞նք են հիվանդության առաջացման հիմնական պատճառները:

–   Շաքարախտի առաջացման հիմնական պատճառներից մեկը անառողջ ապրելակերպն է։ Սխալ սննդային ռեժիմը, վնասակար սովորությունները` ծխելը, ալկոհոլը, սակավաշարժությունը, առողջության հանդեպ անհետևողականությունը, իսկ այս ամենը մեծ տարածում ունեն նաև մեր ազգաբնակչության շրջաններում:

–  Նշեցիք, որ  դիաբետն  առ այսօր անբուժելի է, իսկ ինչպե՞ս կանխարգելել հիվանդության զարգացումը:

–   Հիվանդությանը հաջորդող բարդությունների զարգացումը կարելի է դանդաղեցնել: Սա արդեն դրական է: Շաքարախտով հիվանդ մարդը, եթե վարում է ակտիվ կենսակերպ, հետևում է իր առողջությանը, կարող է այդպես ապրել ևս 30, 40 տարի ու պրակտիկորեն համարվել առողջ:

–   Շա՞տ են մահվան ելքով դեպքերը:

–   Ամբողջ աշխարհում հիվանդության բարդություններից 2011 թ. գրանցվել է 4.6 միլիոն մահ:

Կոնֆերանս՝ նվիրված Դիաբետի դեմ պայքարի համաշխարհային օրվան

–   Տիկին Հայրապետյան, ինչպե՞ս խուսափել շաքարախտի հնարավոր առաջացումից:

–   Եթե մարդն ամեն օր զբաղվի ֆիզկուլտուրայով, սպորտով, շաքարախտով հիվանդանալու հավանականությունը մի քանի անգամ կկրճատվի: Թվում է, թե հասարակ բան է, մտածում ենք, թե ժամանակ չունենք, որովհետև հոգեբանորեն պատրաստ չենք ընդունելու դրա անհրաժեշտությունը: 

–   Տարիքային և սոցիալական ո՞ր խմբերն են շաքարախտի թիրախային գոտում:

–   Շաքարախտով ավելի շատ հիվանդանում են 40-59 տարեկանում:  Ցավոք, բոլոր հիվանդների 80%-ը ցածր զարգացման մակարդակ ունեցող և զարգացող երկրներում են: 

–   Ո՞րն է այս միջոցառման գլխավոր նպատակը:

–   Հիմնական նպատակներից է մարդկանց տեղեկացված պահել հիվանդության զարգացմանը նպաստող ռիսկի գործոնների մասին, որպեսզի կարողանան վերահսկել դրանք, վերանայեն վատ սովորությունները, վարեն ակտիվ կենսակերպ: Սա է հիմնականը, որով պետք է ուղղորդվենք, եթե ուզում ենք վաղն առողջ սերունդ ունենալ:

Կոնֆերանսին մասնակցում էին մի շարք դեղագործական ընկերություններ: Հովանավորներից  ներկա էր «Meda Pharmaceuticals Switzerland» դեղագործական ընկերության հայաստանյան ներկայացուցչությունը։ Մենք զրուցեցինք  բժշկական ներկայացուցիչ Յանա Բազիկյանի հետ:

–   Կներկայացնե՞ք Ձեր ընկերությունը:

–   ՄԵԴԱ-ն միջազգային դեղագործական ընկերություն է, որն ունի ներկայացուցչություններ աշխարհի ավելի քան 50 երկրներում, իսկ դեղամիջոցները վաճառվում են աշխարհի մոտ 120 երկրներում: Այս տվյալներով ՄԵԴԱ-ն տեղ է գրավում աշխարհի առաջատար 50 դեղագործական ընկերությունների սանդղակում:

–   Ե՞րբ է սկսել և ո՞ր ոլորտներում է ծավալում իր գործունեությունը Հայաստանում:

–   Հայաստանում  «Meda Pharmaceuticals Switzerland»-ի ներկայացուցչությունը պաշտոնապես գրանցվել է 2011թվականին, իսկ ապրանքանիշերը ավելի քան 10 տարի է, ինչ ներկրվում են Հայաստան։ Մեր ընկերության արտադրության դեղամիջոցները հիմնականում ուղղված են ներզատական և նյարդային համակարգերի հիվանդությունների բուժմանը, օգտագործվում են թերապիայի, պլաստիկ վիրաբուժության և էլի մի շարք բժշկական բնագավառներում:

–   Ո՞րն է Ձեր ընկերության   և Շաքարախտի հայկական ասոցիացիայի համագործակցության նպատակը:

–   Սկսած 2011 թվականից համագործակցում ենք ասոցիացիայի հետ: Մեր նպատակը հիվանդներին արդյունավետ և օրիգինալ դեղամիջոցներով ապահովելն է, հիվանդի կյանքի որակի բարձրացումը:

Կոնֆերանսի հովանավորներից էր  նաև «Գեդեոն Ռիխտեր» դեղագործական ընկերության հայաստանյան ներկայացուցչությունը, ընկերության մենեջեր Լուսինե Բլուրցյանի հետ զրուցեցինք ընկերության նպատակների և գործառույթների մասին:

–   Ներկայացրեք, խնդրեմ, Ձեր ընկերությունը։

–   «Գեդեոն Ռիխտեր» ընկերությունն ամբողջ աշխարհում հայտնի է ավելի քան 110 տարվա պատմությամբ: Այն ներառում է դեղագործական գործունեության ամբողջական համակարգ՝ նոր, ավելի արդյունավետ դեղամիջոցների որոնումից ու ուսումնասիրությունից մինչև մարքեթինգի և ապրանքի իրացման օպտիմալ տեխնոլոգիական փուլի մշակում: Մեր ընկերության ներկայացուցչությունը Հայաստանում պաշտոնապես գործում  է արդեն մոտ 20 տարի, իսկ նրա արտադրության ապարանքանիշերը հայտնի են մեր երկրում 60 տարուց ավելի:

–   Ձեր մասնակցությունը կոնֆերանսին թույլ է տալիս ենթադրել, որ համագործակցում եք Շաքարախտի հայկական ասոցիացիայի հետ և դեղամիջոցներ առաջարկում բժշկության այս ոլորտում:

–   Այո, ներկայացուցչության ստեղծման պահից համագործակցում ենք ասոցիացիայի հետ: Ներզատական համակարգում ներկայացնում ենք դեղամիջոցներ, որոնք օգտագործվում են բարձր ճնշման և արյան մեջ խոլեսթերինի բարձր մակարդակի ժամանակ, դիաբետիկ պոլինեյրոպաթիայի դեպքում կիրառվող հակացավային դեղամիջոցներ և այլն: Իհարկե, բժշկական այս ոլորտով չեն սահմանափակվում Հայաստան ներկրվող «Գեդեոն Ռիխտեր» ընկերության արտադրության ապրանքանիշերը, օրինակ. լայն սպեկտրով հորմոնալ դեղամիջոցներ են կիրառվում գինեկոլոգիական պրակտիկայում` կանանց սեռական հորմոնալ խանգարումների բուժման նպատակով: Բացի ասոցիացիայի կողմից կազմակերպած կոնֆերանսների մասնակցությունից, մեր ընկերությունը կազմակերպում է նաև այլ միջոցառումներ, սեմինարներ, երբ կա նոր ասելիք, նոր ապրանքանիշ` ներկայացնելու բժիշկներին։ Մեր կարևոր նպատակներից է նաև կազմակերպած միջոցառումներին ներգրավել Հայաստանի բոլոր մարզերի բժիշկներին: 

Գեդեոն Ռիխտեր դեղագործական ընկերությյուն		Կոնֆերանս՝ նվիրված Դիաբետի դեմ պայքարի համաշխարհային օրվան		Գեդեոն Ռիխտեր. պաշտոնական ներկայացուցիչ Լուսինե Բլուրցյան

Հարցեր, պատասխաններ, մեկնաբանություններ