Մարգարյան ծննդատան ամենամեծ ձեռքբերումը լույս աշխարհ եկած շուրջ 300.000 երեխաներն են

Ուղիղ 80 տարի առաջ Երևանում հիմնվեց Հայաստանի լավագույն մանկաբարձա-գինեկոլոգիական բուժհաստատություններից  մեկը` «Մոր եւ մանկան առողջության պահպանման գիտահետազոտական կենտրոնը» (հասարակությանը հայտնի` որպես Մարգարյան ծննդատուն): Դեկտեմբերի 20-ին  կայացավ Կենտրոնի  ստեղծման 80-ամյակին նվիրված գիտաժողով-միջոցառում: 

Հոբելյանի առթիվ զրուցեցինք ՄՈՐ ԵՎ ՄԱՆԿԱՆ ԱՌՈՂՋՈՒԹՅԱՆ ՊԱՀՊԱՆՄԱՆ գիտահետազոտական կենտրոնի ղեկավար պրոֆ. Գեորգի Օկոևի հետ:

ՄՈՐ ԵՎ ՄԱՆԿԱՆ ԱՌՈՂՋՈՒԹՅԱՆ ՊԱՀՊԱՆՄԱՆ գիտահետազոտական կենտրոնի տնօրեն, բ.գ.դ., պրոֆեսոր Գեորգի Օկոև

–  Պարոն Օկոև, նախ ուզում ենք  ի սրտե շնորհավորել  Ձեզ` «Մոր եւ մանկան առողջության պահպանման գիտահետազոտական կենտրոնի» հոբելյանի կապակցությամբ:  80-ամյա պատմության մեջ  ո՞րն է` ըստ  Ձեզ, ձեր կենտրոնի ամենագնահատելի ձեռքբերումը:

–  Շնորհակալությու′ն` ջերմ շնորհավորանքի համար: Այսօր մենք տոնում ենք մեր կենտրոնի 80-ամյակը: Կարծում եմ` մեր երկրում  հազվագյուտ բժշկական հաստատություններ կարող են փաստել, որ կատարում են 80 տարի տևած բժշկական պարտականություններ: Մեր ամենամեծ ձեռքբերումն այս տարիների ընթացքում մոտ 300.000 ծնված երեխաներն են: Կան գիտական, գործնական, տեխնիկական ձեռքբերումներ, բայց ամենագնահատելին երեխաներն են, ովքեր ծնվել են Մարգարյան ծննդատանը:  

–  Եթե համեմատական անցկացնենք  այլ բուժհաստատությունների հետ, ըստ Ձեզ, վարկանիշային աղյուսակում ո՞ր հորիզոնականը կզբաղեցնի Մարգարյան ծննդատունը:

–  Դժվար է սեփական հիմնարկը ներկայացնել գովեստի խոսքերով: Պարզ է մի բան. չեմ կարծում, որ կա Հայաստանում ապրող որևէ մեկը, ով չիմանա Մարգարյան ծննդատան մասին` որտեղ է, ինչ հիվանդանոց է…

ՄՈՐ ԵՎ ՄԱՆԿԱՆ ԱՌՈՂՋՈՒԹՅԱՆ ՊԱՀՊԱՆՄԱՆ գիտահետազոտական կենտրոն

–  Առանց խոչընդոտների պատմություն չի ստեղծվում, ինչպիսի՞ խնդիրներ են հանդիպել ձեր ճանապարհին:

–  Առանց դժվարությունների կյանք չի լինում: Բժշկության մեջ ևս լինում են հաջողություններ, բարդություններ, բայց մեր հաջողությունները, մեր հաղթանակները շատ ավելի շատ են ու ակնառու: Դա արդեն մեզ իրավունք է տալիս վստահ առաջ շարժվելու ու ասելու. մենք հանդիպենք մեր 90-ամյակին, որին այսօր արդեն Ձեզ նախապես հրավիրում եմ, հետո էլ` 100-ամյակին, ու կշարունակենք խոսել` ինչ է տեղի ունեցել հաջորդիվ 20 տարիների ընթացքում...

–  Համագործակցո՞ւմ է արդյոք ծննդատունը տարածաշրջանի կամ արտասահմանյան բուժհաստատությունների հետ:

–  Այո, իհարկե: Մենք համագործակցում ենք Ռուսաստանի Դաշնության Վ. Կուլակովի անվան կենտրոնի հետ, Ուկրաինայի պերինատոլոգիայի կենտրոնի, Ֆրանսիայի «Վերարտադրողական առողջության ինստիտուտի», Իսրայելի, Անգլիայի ու էլի մի շարք երկրների առաջատար բուժհաստատությունների և բժիշկների հետ:

–  Ինչո՞վ է կարևորվելու այս օրը և արդյո՞ք այն ենթադրում է նոր աշխատանքային սկիզբ:

–  Այսօրը կդառնա պատմություն: Իհարկե, ով պատմությունը չի հիշում, նա չունի ապագա, բայց ես վստահ եմ, որ մենք միայն պատմությունով չենք ապրելու: Մենք նոր նախագծեր ունենք, պետք է շարունակենք աշխատել ավելի մեծ եռանդով. բժշկությունը զարգանում է, և մենք պետք է փորձենք քայլել նրան համընթաց:

Դեկտեմբերի 20-ին կայացավ ՄՈՐ ԵՎ ՄԱՆԿԱՆ ԱՌՈՂՋՈՒԹՅԱՆ ՊԱՀՊԱՆՄԱՆ գիտահետազոտական կենտրոնի 80-ամյակին նվիրված գիտաժողով-միջոցառում

–  Որպես ոլորտի լավագույն մասնագետներից, կարող ե՞ք նշել` ո՞ր խնդիրն է այսօր հատկապես հրատապ, և ի՞նչ լուծում եք առաջարկում:

–  Խնդիրները շատ են.  ես չեմ կարող դրանք բոլորը նշել, միայն կա մեկ ցանկություն, խորհուրդ… Ուզում եմ մաղթել մեր երիտասարդներին շատ երեխաներ ունենալ: Տատիկ-պապիկնե´ր, ստիպե´ք երիտասարդներին շատ թոռնիկներ պարգևեն ձեզ...

ՄՈՐ ԵՎ ՄԱՆԿԱՆ ԱՌՈՂՋՈՒԹՅԱՆ ՊԱՀՊԱՆՄԱՆ գիտահետազոտական կենտրոնի գիտության գծով փոխտնօրեն, պրոֆեսոր Կարինե Առուստամյան

Մեր հաջորդ զրուցակիցն է Մոր եւ մանկան առողջության պահպանման գիտահետազոտական կենտրոնի գիտության գծով փոխտնօրեն, պրոֆեսոր Կարինե Առուստամյանը:

–  Տիկին  Առուստամյան, կարո՞ղ եք հիշել Մարգարյան ծննդատան 80-ամյա պատմության ամենավառ կետերը:

–  Դժվար է այսօր առանձնացնել այդ կետերը: Յուրաքանչյուր պատմություն ունի իր սկիզբը, ընթացքը, ապագան: Այսօր այդ երեքը միահյուսվել են: Կենտրոնի պատմության համար վառ է եղել 1931 թ., երբ պրոֆ. Գ. Արեշյանի ջանքերով ստեղծվել է Մայրության և մանկության ինստիտուտը, վառ է եղել 1951 թ., երբ այն տեղափոխվել է նորակառույց շենք և շարունակել աշխատանքը պրոֆեսոր Պ. Մարգարյանի ղեկավարությամբ, 1973 թվականը, երբ մեծ Գր. Օկոևի (հայր Օկոև) ղեկավարությամբ կազմափոխումներ տեղի ունեցան՝ թե´ կառուցվածքային, թե´ գիտական, թե´ սարքավորումների ձեռք բերման առումով: Չի´ կարելի այսօր չնշել Գեորգի Օկոևին(որդի Օկոև), ով շարունակեց վերակառուցողական գործընթացների ընտրած ուղին, ժամանակի պահանջներին համահունչ ներդրեց և իրականացրեց նոր ախտորոշիչ և  բուժական մեթոդներ, այդ թվում՝ վերարտադրողական օժանդակ տեխնոլոգիաներ , մասնավորապես` արտամարմնային բեղմնավորման մեթոդը:

–  Դժվարություններն օգնում են ձգտելու` ավելի առաջ շարժվել, կատարելագործվել…

–  Երբ որևէ բժիշկ անհաջողություն է  ունենում՝ կապված հիվանդի հետ, ավելի ստույգ` երբ հիվանդը բավարարված չի հեռացել, դա ամենամեծ խթաններից մեկն է բժշկի և առհասարակ ողջ անձնակազմի համար` անելու ամեն հնարավորը, որ հաջորդ հիվանդը է´լ ավելի շրջապատված լինի հոգատար վերաբերմունքով, հավատա, վստահ ու պաշտպանված զգա։

–  Ի՞նչ խորհուրդ ունի այսօրվա միջոցառումը:

–  Այսօր Մոր և մանկան առողջության պահպանման գիտահետազոտական կենտրոնի  ծննդյան օրն է: Մենք ուզում ենք հարգանքի տուրք մատուցել մեր մեծերին, ովքեր ջանք ու եռանդ չեն խնայել` ստեղծելու ու կայացնելու կենտրոնը, վերհիշել ու մեծարել նախորդ սերունդների երախտավորներին, ովքեր իրենց հարուստ փորձն են փոխանցել մեզ: Անշուշտ, պետք է շնորհակալություն հայտնենք այսօրվա բժիշկներին,  ովքեր իրենց նվիրումով աշխատանքով օրինակ են դառնալու մեր ապագա բժիշկների համար:

ՄՈՐ ԵՎ ՄԱՆԿԱՆ ԱՌՈՂՋՈՒԹՅԱՆ ՊԱՀՊԱՆՄԱՆ գիտահետազոտական կենտրոնի 80-ամյակին նվիրված միջոցառմանը ներկա էր Զորի Բալայանը

Հարցեր, պատասխաններ, մեկնաբանություններ