Ե՛վ համեղ, և՛ բուժիչ (մանդարին, խնձոր, լոլիկ, կիտրոն)

Նոր տարվա սեղանին հյութեղ ու հոտավետ մանդարինի հայտնվելը, պարզվում է, այնքան էլ պատահական չէ: Այն ոչ միայն օգնում է  քաշը կարգի բերելուն, այլև արդյունավետ է  տոնական սեղանների ուտելիքներից  մեծապես տուժած լյարդի հյուսվածքները վերականգնելու գործում: Այս եզրահանգման հեղինակները կորեացի գիտնականներն են:

Հետազոտությանը մասնակցած 60 մարդկանցից երկու խումբ կազմվեց. մի խմբի հետազոտվողները մեկ ամիս շարունակ  խմել են մանդարինի հյութ ու ֆիզիկական վարժություններ կատարել, իսկ մյուսը բավարարվել էր միայն վարժություններով: Փորձի վերջում    կատարված ուսումնասիրություններով  պարզվել է, որ մանդարինի հյութ խմած խումբը 1,5%-ով ավելի բարեկազմ է դարձել մյուս խմբի համեմատությամբ:

Երկարակեցության ու առողջության ժողովրդական միջոցներ

Իմունիտետի ամրապնդման  հրաշալի դեղամիջոց. պատրաստման համար հարկավոր է 1 կգ մեղր, 10 կիտրոնի  հյութ, 10 գլուխ սխտոր (աղացած): Բոլոր բաղադրիչները խառնել իրար, լցնել ապակյա տարայի մեջ  ու  ամուր փակել  բերանը, դնել սառնարանն ու թողնել մեկ շաբաթ: Դրանից հետո կարելի է օգտագործել  ամեն օր 4-ական թեյի գդալ:  Չպետք է միանգամից կուլ տալ, այլ` անշտապ. սկզբում մի գդալ, ապա մյուսը…: Ընդմիջում նույնպես չի կարելի տալ: Ստացված զանգվածը կբավարարի 2 ամիս:

Այս միջոցն արդյունավետ է նույնիսկ այն տարեցների դեպքում, ովքեր դժվարանում են առանց դադար առնելու 50 քայլ գցել:

Հրաշք- միրգը` խնձորը

Սննդարար ու բուժիչ հատկություններով խնձորը  զգալի տեղ է զբաղեցնում  կանաչ «դեղատան» մեջ: Խնձորն օգտակար է  ինչպես աղեստամոքսային տրակտի, այնպես էլ  ավելորդ քաշի, արյան բարձր ճնշման  կարգավորման համար:

Գիտնականները կարծում են, որ մենք տավա կտրվածքով պետք է ուտենք  մոտ 60 կգ խնձոր: Դրա շնորհիվ մեր օրգանիզմը ստանում է շաքարի անհրաժեշտ քանակ, օրգանական թթուներ, հանքանյութեր և այնպիսի նյութեր, որոնք ունեն մանրէասպան հատկություն: Եվ որքան շատ խնձոր ենք ուտում, այնքան մյուս սննդարար նյութերը (օրինակ` սպիտակուցները) լավ են յուրացվում օրգանիզմում: Խնձորի մեջ կա  և՛ գլյուկոզա, և՛ ֆրուկտոզա,  և՛  սախարոզա, ինչը կարևոր է իմանալ, քանզի շատերին սախարոզան պարզապես հակացուցված է: Իսկ ֆրուկտոզան սովորական շաքարից 2 անգամ ավելի քաղցր է, սակայն , ի տարբերություն  շաքարի, այն օրգանիզմի վրա բարերար ազդեցություն ունի:

Խնձորում  պարունակվող թթուներից հիմնականը  խնձորաթթուն է, դրանից բացի, խնձորի մեջ կա նաև կիտրոնաթթու ու  գինեթթու: Ձմեռային տեսակներն ավելի չոր տարրեր են պարունակում (ինչպիսիք, օրինակ, շաքարներն ու թթուներն են), քան ամառային տեսակները: Արժեքավոր են այն տեսակները, որոնք պարունակում են պեկտինային նյութեր: Դրանք օգնում են օրգանիզմից ծանր մետաղների, թունավոր նյութերի դուրսբերմանը: Խնձորի մեջ կա 5-30 մգ վիտամին C: Հետաքրքիր է, որ անձրևոտ ամառվա դեպքում դրա քանակը մեծանում է:  Գարնանը վիտամինային «քաղցի» պարագայում խնձորն օգնում է այդ պակասը լրացնելուն: Խնձորի մեջ պարունակվող երկաթն ու վիտամինային փունջն օգնում են հարմարվելու շրջակա փոփոխություններին: Ժողովրդական բժշկության մեջ օգտագործվում են խնձորենու պտուղները, դրանց հյութը, ինչպես նաև ծառի տերևները:

Առողջության աղբյուր լոլիկը

Սա ևս օգտակար մթերք է: Պտուղները պարունակում են պեկտինային ու ազոտական նյութեր, շաքարներ,ասկորբինային, խնձորային, քացախաթթուներ, ֆլավոնոիդներ, ալկալոիդներ, տիամին, հանքային աղեր (հատկապես կալիում): Պտուղների կարմրությունը պյմանավորված է կարոտինոիդներով, լիկոպինով: Վերջերս կատարված հետազոտություններով  պարզվեց , որ լիկոպինը ևս մարդու և կենդանիների օրգանիզմում  կարող է վերածվել A վիտամինի (ռետինոլ): Լոլիկը բազմավիտամինային բույս է համարվում: Դրա, ինչպես նաև կալիումական, երկաթի ու մանգանի, կոբալտի ու ցինկի աղերի պարունակության շնորհիվ այն հիմնականում առաջարկվում է սիրտ-անոթային , նյութափոխանակության խանգարման հետ կապված հիվանդությունների դեպքում: Քանի որ լոլիկը  փափուկ է, այն հեշտությամբ է մարսվում ու յուրացվում, ուստի առաջարկվում  է աղեստամոքսային  տրակտի հիվանդությունների դեպքում: Լոլիկն ունի թեթևակի թուլացնող հատկություն, ինչի շնորհիվ աղիքների աշխատանքն ակտիվանում է:  Հավաստի տվյալներ կան, որ թարմ լոլիկը կամ տոմատի  թարմ հյութը իջեցնում են արյան բարձր ճնշումն ու  արյան մեջ նվազեցնում խոլեստերինի քանակը:

Լոլիկը գերազանց միջոց է համարվում աթերոսկլերոզի ու գիրության կանխարգելման համար: Թարմ պտղամիսն ու հյութը պարունակում են հակաօքսիդանտ համարվող լիկոպին, որը խանգարում է մի շարք  միկրոօրգանիզմների աճին: Լոլիկի հյութն օգտագործում են մարսողական զանազան խանգարումների, ստամոքսի խոցային  հիվանդությունների, հյուծվածության, երիկամաքարային հիվանդությունների դեպքում: Թարմ պտուղների մզվածքը կարելի է օգտագործել թարախային վերքերի ու խոցերի բուժման կամ էլ կոշտուկների վերացման նպատակով:

Օգտակար ու համեղ, օրգանիզմը մաքրող ու բուժող

Այս նպատակով կարելի է պատրաստել ոչ միայն օգտակար, այլև համեղ  ժողովրդական միջոցներ: Առաջարկվող միջոցները կհարստացնեն օրգանիզմը վիտամիններով, միկրո- և մակրոտարրերով, որոնք կօգնեն բուժվելու և ազատվելու խարամից.

• Արծնապատ (էմալ) կաթսայի մեջ 100 գ մեղր լցնել, ավելացնել կարագ ու հալվեի հյութ, լավ խառնել և 20 րոպե եռացնել կրակի վրա: Մեկ թեյի գդալ խառնուրդը լուծել 100 գ տաք եռացրած կաթի մեջ, ընդունել օրական 3 անգամ, ուտելուց առաջ:

• 1 կիտրոնի, 2 նարնջի և 2 թուրինջի թարմ հյութը խառնել 1 լ հանքային ջրի հետ: Ստացված ըմպելիքը հարկավոր է խմել ողջ օրվա ընթացքում: Գործողությունը կատարել մեկ շաբաթ (7 օր) անընդմեջ:

• 1 ճաշի գդալ քերած գազարի վրա ավելացնել նույնքան մանրացրած կարտոֆիլ, նույնչափ էլ թարմ կաղամբ: Ուտել մեկական գդալ` ուտելուց առաջ:

Օրգանիզմը մաքրենք կիտրոնով

Կիտրոնն օրգանիզմը մաքրելու հատկություն ունի: Արյունատար անոթները մաքրելու, զարկերակային ճնշումը, կանոնավորելու  նպատակով պատրաստենք հետևյալ միջոցը.

• 2 կիտրոնն  ու 2 միջին չափի նարինջը կիսել,  հեռացնել կորիզներն ու աղալ: Ստացված զանգվածին ավելացնել 2 ճաշի գդալ մեղր ու խառնել, ապա լցնել ապակյա տարայի մեջ ու թողնել մեկ օր սենյակային ջերմաստիճանի պայմաններում: Դրանից հետո դնել սառնարանը: Ընդունել  օրական 3-ական ճաշի գդալ, ուտելուց առաջ կամ էլ թեյի հետ:

• 1 բաժակ եռացրած ջրի (40 աստիճանից ոչ ավելի ) ավելացնել կես կիտրոնի հյութ և 1 թեյի գդալ մեղր: Խառնել ու խմել:

  Ըմպելիքը կարելի է պատրաստել օրական 3-4 անգամ, ընդունել  օրգանիզմի սկլերոտիկ նստվածքներից  ազատվելու նպատակով:

Հարցեր, պատասխաններ, մեկնաբանություններ