Երևանում կբացվի օնկոլոգիական նոր կենտրոն. «Այն կդառնա միակը տարածաշրջանում, որտեղ ժամանակակից տեխնոլոգիաներով դեղեր կարտադրվեն»

Երևանի Աջափնյակ համայնքում այսօր տեղի ունեցավ Ուռուցքաբանության գերազանցության հայկական կենտրոնի հիմնարկեքի արարողությունը, որին ներկա գտնվեց ՀՀ նախագահ Սերժ Սարգսյանը:

Կենտրոնի ստեղծման երկարաժամկետ ծրագիրը համատեղ մշակվել է Հայաստանի ազգային մրցունակության հիմնադրամի, ՀՀ էկոնոմիկայի և առողջապահության նախարարությունների կողմից: Այն իրականացնելու է ռադիոիզոտոպների արտադրության, ռադիոիզիտոպային, ռադիոլոգիական և լաբորատոր ախտորոշման, ռադիոիզոտոպային և ճառագայթային, ուռուցքաբանական ներհիվանդանոցային և արտահիվանդանոցային վիրաբուժական, քիմիաթերապևտիկ և այլ ծառայություններ:

Կենտրոնի ճարտարապետա-շինարարական նախագծերն իրականացվել են բելգիական IBА և ամերիկյան GMS ընկերությունների կողմից, իսկ ՀՀ կառավարության որոշմամբ նորաստեղծ կենտրոնին տրամադրվել է 1,1 միլիարդ դրամ երկարաժամկետ բյուջետային վարկ, ինչպես նաև` Ա.Ալիխանյանի անվան Ազգային Գիտական Լաբորատորիայի տարածքում առանձնացվել 13500 քառակուսի մետր հողատարածք: Նշենք, որ Ուռուցքաբանության գերազանցության հայկական կենտրոնի ստեղծման ծրագրի ընդհանուր արժեքը գնահատվում է 30-60 միլիոն ԱՄՆ դոլար:

Ճեպազրույցում Հայաստանի ազգային մրցունակության հիմնադրամի հոգաբարձուների խորհրդի անդամ Հայկ Բաքրջյանը նշեց, որ կենտրոնի առաջնային խնդիրն է բավարարել ժամանակակից միջազգային չափանիշներին համապատասխան ուռուցքային հիվանդությունների բուժման պահանջարկը` ստեղծելով այնպիսի ենթակառուցվածք, որը թույլ կտա դարձնել այն տարածաշրջանային կենտրոն և խթանել բժշկական շրջանառությունը: Նա վստահեցրեց, որ կենտրոնը հասանելի կլինի հայ հասարակության լայն շրջանակներին:  Բացի այդ, նրա խոսքով` այս բուժհաստատությունը կդառնա միակը տարածաշրջանում, որտեղ ժամանակակից, վերջին տեխնոլոգիաներով զինված սարքերի միջոցով դեղեր են արտադրվելու:

«Կկարողանանք կենտրոնի ժամանակակից սարքերը գործածել նոր դեղեր արտադրելու համար»,- ասաց Հայկ Բաքրջյանը:

Իր հերթին հոգաբարձուների խորհրդի մյուս անդամ Արա Դարզինը նշեց, որ կենտրոնը հնարավորություն կտա ավելի վաղ ախտորոշում անել և ավելի ճշգրիտ որոշել ինչ տիպի ուռուցքի հետ գործ ունեն: «Խոսքը ոչ միայն քաղցկեղին է վերաբերում, այլև այլ հիվանդությունների: Կենտրոնը խթան կհանդիսանա ոչ միայն ազգի առողջության, այլ նաև տնտեսության աճի առումով»,- հավելեց նա:

Հիմնարկեքի բացման խոսքում ՀՀ էկոնոմիկայի նախարար Տիգրան Դավթյանը կարևորեց այն, որ ծրագիրն իրականացնում է պետական և մասնավոր հատվածների, ինչպես նաև` միջազգային կառույցների մասնակցությամբ: «Սա պետության, մասնավորի ու միջազգային ընկերությունների միջև համագործակցության  փայլուն օրինակ է »,- ասաց նա, շեշտելով, որ ծրագիրը կարևոր է ոչ միայն գիտության, այլ նաև տնտեսության համար, քանի որ հնարավորություն կտա նաև արտահանել արտադրությունը:

Առողջապահության նախարար Դերենիկ Դումանյանն էլ իր խոսքում ընդգծեց, որ ծրագիրը հնարավորություն կտա հանրության մոտ որակապես նոր մոտեցում ձևավորել բուժծառայության նկատմամբ:  Նա ցավով նաև նշեց, որ վերջին տարիներին Հայաստանում նկատվում է օնկոլոգիական հիվանդությունների աճ և հույս հայտնեց, որ կենտրոնի գործունեությունը համարժեք պատասխան կլինի այդ մարտահրավերին:

Հարցեր, պատասխաններ, մեկնաբանություններ