«Մխիթար Հերացի» բժշկագիտության զարգացման հիմնադրամը նվիրաբերեց շտապ օգնության մեքենա նորածնային վերակենդանացման համար

Այսօր Երևանի Մ.Հերացու անվան պետական բժշկական համալսարանի «Մուրացան» հիվանդանոցային համալիրում իրականացվեց բարեգործական միջոցառում՝ նվիրված Երեխաների պաշտպանության միջազգային օրվան:

Միջոցառման ընթացքում Երևանի Մ.Հերացու անվան պետական բժշկական համալսարանի «Մխիթար Հերացի» բժշկագիտության զարգացման հիմնադրամի կողմից, որի գործադիր տնօրենը ԵՊԲՀ աշխատակազմի ղեկավար Գագիկ Միրիջանյանն է, «Մուրացան» հիվանդանոցային համալիրի Մանկական և նորածնային վերակենդանացման բաժանմունքին նվիրաբերվեց շտապ օգնության հատուկ մեքենա:

Նվիրատվության արարողությունից հետո Տեր Շմավոն սրբազանն օրհնեց ներկաներին և ուժ, կարողություն ու հաջողություն մաղթեց բոլորին՝ բժշկի դժվարին առաքելությունն իրականացնելու գործում:

Ինչպես նշեց մանկական և նորածնային վերակենդանացման կլինիկայի ղեկավար, ՀՀ առողջապահության նախարարության գլխավոր նեոնատոլոգ Հրանտ Կալենտերյանը, իրենց բաժանմունքում տարեկան բուժվում է շուրջ 600 երեխա, սակայն մինչ այժմ չեն ունեցել նորածինների տեղափոխման համար մեքենա: Նրանց տեղափոխում էին մեծահասակների համար նախատեսված մեքենաներով, ինչը լրացուցիչ բարդություններ և անհարմարություն էր ստեղծում: Նրա խոսքերով՝ հիմնադրամի կողմից բաժանմունքին նվիրաբերված մեքենան փափուկ է, ինչը շատ կարևոր է, նախատեսված է նորածինների տեղափոխության համար և հագեցած է բժշկական անհրաժեշտ բոլոր սարքավորումներով:

ԵՊԲՀ աշխատակազմի ղեկավար, «Մխիթար Հերացի» բժշկագիտության զարգացման հիմնադրամի գործադիր տնօրեն Գագիկ Միրիջանյանը տեղեկացրեց, որ նվիրատվության նախաձեռնությունը պատկանում է ԵՊԲՀ կլինիկական աշխատանքների գծով պրոռեկտոր Արմեն Մինասյանին, և ԵՊԲՀ ռեկտորի համաձայնությունն ու հանձնարարականը ստանալուց հետո իրենք համատեղ ուժերով կարողացան իրականացնել այն: Գագիկ Միրիջանյանը վստահություն հայտնեց, որ նմանատիպ մեքենայի առկայությունը նորածինների տեղափոխության և բուժման գործընթացում ոչ միայն հնարավորություն կտա փրկել բազմաթիվ նորածինների կյանքեր, այլև կլինի բժշկագիտության զարգացմանն ուղղված արդյունավետ քայլ:

ԵՊԲՀ կլինկական աշխատանքների գծով պրոռեկտոր Արմեն Մինասյանն իր խոսքում նշեց, որ «Մուրացան» հիվանդանոցային համալիրը համարվում է մանկական և նորածնային վերակենդանացման հանրապետական կենտրոն, ուստի հանրապետության բոլոր մարզերից այստեղ են տեղափոխվում խնդիրներ ունեցող նորածինները, իսկ նվիրաբերված մեքենան ավելի արդյունավետ կդարձնի նորածինների տեղափոխությունը և բուժումը, քանի որ զինված է բժշկական տեխնիկայի վերջին խոսքին համապատասխան:

Նշենք, որ «Մուրացան» հիվանադանոցային համալիրին նվիրաբերված մեքենան առաջինն ու միակն է ոչ միայն Հայաստանում, այլև ողջ տարածաշրջանում:

Հարցեր, պատասխաններ, մեկնաբանություններ