Աորտայի բալոնային օկլյուզիվ էնդովասկուլյար մեթոդի կիրառելիության անհրաժեշտությունը Հայաստանում

Մարտ 14-ին ՎԱՇԻՆԳՏՈՆ-ԵՐԵՎԱՆ տեսակապի միջոցով Հանրապետական գիտաբժշկական գրադարանում տեղի ունեցավ «Աորտայի բալոնային օկլյուզիվ էնդովասկուլյար վերականգնման դերը ռազմական վնասվածքների դեպքում» տեսակոնֆերանսը: Օրվա բանախոսը Վաշինգտոնից MedStar սրտի և անոթային ինստիտուտի, MedStar Վաշինգտոնի հիվանդանոցային կենտրոնի և Ջորջթաունի համալսարանի հիվանդանոցի անոթային վիրաբույժ Վահրամ Օրնեկյանն էր, ով պատասխանեց մի քանի հրատապ հարցերի:

- Ի՞նչ է իրենից ներկայացնում աորտայի բալոնային օկլյուզիվ էնդովասկուլյար մեթոդը և ի՞նչ դերակատարում կարող է ունենալ ռազմական վնասվածքների բուժման գործընթացում:

-Այս մեթոդը հնարավոր է կիրառել ռազմի դաշտում: Ռազմական գործողությունների ընթացքում, երբ մարդու մոտ գրանցվում է արյունահոսություն, ծայր անհրաժեշտություն է հնարավորին արագ դադարեցնել այն, հատկապես, երբ խոսքը վերաբերում է աորտային և ստորին վերջույթների մագիստրալ անոթներին: Անմիջապես անոթի մեջ պետք է տեղադրել խողովակ եւ փակել բալոնով, որպեսզի դադարեցվի արյունահոսությունը: Այս մեթոդը ի զորու է շատ կյանքեր փրկել:

 
Մինչև օրս ի՞նչ  մեթոդ էր կիրառվում արյունահոսությունը դադարեցնելու համար:  

-Մինչև այս մեթոդի կիրառությունը գործածելի էր միայն վիրահատական միջամտությունը: Վիրահատական միջամտությամբ բացվում էր վնասված հատվածը եւ արյունահոսող անոթի վրա տեղադրվում փական՝ արյան հոսքը դադարեցնելու համար: Բալոնային օկլյուզիվ էնդովասկուլյար մեթոդով` առանց վիրահատական միջամտության, անմիջապես հնարավոր է փակել և դադարեցնել անոթից հոսող արյունը:

Աորտայի բալոնային օկլյուզիվ էնդովասկուլյար մեթոդը ռազմական վնասվածքների դեպքում ի՞նչ առավելություն ունի մինչև օրս կիրառվող մեթոդների նկատմամբ:

-  Թիվ մեկ առավելությունն այն է, որ արյան անոթի շատ փոքր անցքով հնարավոր է դադարեցնել արյան հոսքը:  Կարեւոր առանձնահատկություններից է նաեւ այն, որ գործողությունը կատարվում է  շատ արագ, նույնիսկ  էքստրեմալ պայմաններում՝ նախքան հիվանդին վիրահատարան հասցնելը:

Մեթոդի կիրառումը որքանո՞վ է տարածված արտերկրում, և ըստ Ձեզ՝ Հայաստանում պրակտիկորեն ինչպե՞ս է  հնարավոր ներդնել:

-Այս մեթոդը ԱՄՆ-ի 250-ից ավելի կլինկաներում գործածվում է: Շատ տարածված է Անգլիայում, Գերմանիայում եւ Ֆրանսիայում: Մեթոդը հարմարավետ է կիրառել ո՛չ միայն ռազմի դաշտում, այլ նաեւ վայրերում, որոնց պարագայում կլինիկական օգնություն ցուցաբերելը պրակտիկորեն անհնար է, օրինակ` ինքնաթիռներում, նավերում: Հայաստանը, լինելով պատերազմող երկիր, մեթոդի ներդրումը և պրակտիկայում կիրառումը դարձնում է հրատապ և անհետաձգելի, ինչն իր արդյունավետությամբ կարող է մարդկային կյանքեր փրկել:

Հարցեր, պատասխաններ, մեկնաբանություններ